Arrestohet 49-vjeçari në Argjentinë: Planoi atentat ndaj Papa Leo XIV pak orë para vizitës historike

Forcat e rendit në Argjentinë kanë vënë në pranga një 49-vjeçar, i cili dyshohet se ka bërë kërcënime serioze me vdekje në drejtim të Papa Leo XIV, ngjarje kjo e regjistruar vetëm pak orë përpara se Ati i Shenjtë të zbarkonte në vend. Sipas të dhënave zyrtare të bëra publike nga Sekretariati i Inteligjencës Shtetërore (SIDE), ndërhyrja erdhi më pak se 24 orë pasi autoritetet u vunë në dijeni për rrezikun. Aksioni u finalizua nga Policia Federale Argjentinase, me urdhër të prerë të gjyqtarit Adrian Gonzalez Charvay, i cili drejton Gjykatën Federale në Campana. Procedurat hetimore nisën gjatë pasdites së të premtes, pasi Njësia e Hetimit Kundër Terrorizmit e Policisë Federale ngriti alarmin mbi një thirrje telefonike që synonte eliminimin fizik të Papës. Specialistët e sigurisë kibernetike dhe agjentët në terren gjurmuan vendndodhjen e të dyshuarit, ndërsa gjatë kontrollit të ushtruar në banesën e tij, efektivët bënë arrestimin e tij dhe sekuestruan tri pajisje celulare – përfshirë edhe atë që dyshohet se u përdor për kanosjen – si dhe një dron, i cili po i nënshtrohet ekspertizës për të zbardhur qëllimin e përdorimit të tij. Ndaj të dyshuarit është ngritur akuza e përkohshme për veprat penale të kërcënimeve anonime dhe nxitjes së frikësimit publik me prapavijë terroriste. Kreu i Kishës Katolike mbërriti në tokën argjentinase gjatë ditës së diel, menjëherë pas përfundimit të vizitës së tij në Montevideo të Uruguait. Agjenda e udhëtimit parashikon që Papa të qëndrojë në Argjentinë deri më 11 nëntor, datë në të cilën ai do të lëvizë drejt Limës së Perusë, duke u nisur nga Aeroporti Ndërkombëtar Ezeiza. Ky udhëtim ka një rëndësi të jashtëzakonshme, pasi përbën vizitën e parë papnore në Argjentinë pas plot 39 vitesh. Për të menaxhuar sa më mirë turmat e mëdha dhe për mbarëvajtjen e këtij eventi madhështor, Presidenti Javier Milei e ka shpallur këtë vizitë çështje me interes kombëtar, duke shpallur edhe ditë pushimi lokal.