Skandali Sky ECC: Opozita serbe publikon dosjen e plotë që lidh krerët e shtetit me krimin e organizuar

Deputetja e opozitës në Serbi, Marinika Tepiq, ka bërë publike dosjen e plotë të përgjimeve nga aplikacioni i koduar Sky ECC, e cila lidhet me figurën e Filip Koraqit. Ajo thekson se në këto dokumente dëshmohen lidhje të ngushta mes strukturave kriminale dhe zyrtarëve më të lartë të shtetit e të policisë serbe. Përmes një reagimi në platformën sociale X, Tepiq bëri të ditur se ky material ishte nxjerrë fillimisht në dritë më 3 qershor 2025. Megjithatë, sipas saj, institucionet vendase, duke përfshirë policinë, prokurorinë dhe Agjencinë e Informacionit të Sigurisë (BIA), kanë preferuar t'i mbajnë provat në sirtar, pa ndërmarrë asnjë hap ligjor ndaj personave të përfshirë. Në materialet e zbardhura përmenden emrat e liderit të shtetit, Aleksandar Vuçiq, vëllait të tij Andrej Vuçiq, ish-sekretarit të përgjithshëm të Qeverisë, Novak Nediq, si dhe ish-zyrtares së lartë të policisë, Dijana Hrkaloviq. Krahas tyre, në dosje figurojnë edhe emra të tjerë të njohur nga klanet famëkeqe kriminale “Kavaç” dhe “Shkaljar”. Politikanja opozitare bëri me dije se Prokuroria për Krim të Organizuar (TOK) ka pranuar vërtetësinë e dokumentacionit, por nuk ka ndërmarrë asnjë veprim konkret. E njëjta qasje pasive, sipas saj, është mbajtur edhe nga Ministria e Punëve të Brendshme dhe BIA. Ajo e ka vlerësuar këtë dosje si versionin e vetëm të paprekur dhe origjinal që vjen drejtpërdrejt nga institucionet evropiane Europol dhe Eurojust, duke hedhur poshtë pretendimet për përzgjedhje apo manipulim të pjesshëm të të dhënave. Sipas pretendimeve të saj, dhjetëra dosjet e publikuara përmbajnë biseda të fshehta, fotografi dhe audio-incizime që faktojnë trafikun e narkotikëve, ndërhyrjet në institucione publike, porositjen e ekzekutimeve, si dhe manipulimet zgjedhore në Serbi, ku përfshihet edhe blerja e votave përmes strukturave kriminale. "Në këtë faqe gjenden dhjetëra dosje me komunikime, fotografi dhe incizime audio për trafikimin e drogës dhe ndikimin, porositjen e vrasjeve, zgjedhjet në Serbi, blerjen e votave përmes kriminelëve e të tjera", u shpreh Tepiq, ndërkohë që ky zhvillim ka rikthyer sërish në vëmendje debatin e nxehtë politik mbi lidhjet e krimit me pushtetin në Serbi.