A rrezikon Manchester United mbijetesën në Ligën Premier? Përgjigjja epike e Michael Carrick pas dramës me Aston Villën

Michael Carrick ka pranuar hapur se Manchester United po ia vështirëson jetën vetes përmes gabimeve elementare në prapavijë, por mbetet i bindur në potencialin e skuadrës për të ngjitur shkallët në renditjen e Ligës Premier. Kujtojmë se “Djajtë e Kuq” barazuan me shifrat 4-4 ndaj Aston Villës në një takim tejet dramatik, ku e nisën sfidën duke u gjendur dy gola në disavantazh. Megjithatë, anglezët arritën ta barazonin rezultatin në 2-2 para se skuadrat të shkonin në pushimin mes pjesëve, por fraksioni i detyroi sërish të vuanin pas dy golave të tjerë të pësuar. Konkretisht, Diogo Dalot shkaktoi një penallti që u shfrytëzua me sukses nga John McGinn, ndërsa Leon Goretzka realizoi për 4-2 në favor të mysafirëve. Edhe pse në situatë kritike, Unitedi nuk u dorëzua dhe falë dy golave të shënuar në gjashtë minutat shtesë të takimit, arriti të rrëmbejë një pikë të rëndësishme. Në prononcimin e tij pas përfundimit të ndeshjes, Carrick nuk e fshehu zhgënjimin për mungesën e fitores, duke ngritur alarmin se gabimet e përsëritura po i kushtojnë shtrenjtë klubit. “Është zhgënjyese që nuk e fituam ndeshjen. Ishim më të mirë në disa periudha, por ia vështirësuam vetes duke dhuruar shumë gola. Nuk ishte vetëm një, por dy brenda një kohe shumë të shkurtër dhe e vendosëm veten në pozitë të vështirë. E bëmë këtë edhe në ndeshjen e kaluar, ndërsa sot u rikthyem përsëri dhe në fund mund edhe ta kishim fituar takimin”, u shpreh ai. I pyetur mbi arsyet pse skuadra po çedon, strategu anglez nënvizoi se problemi lidhet me momente të izoluara loje që kërkojnë korrigjim të menjëhershëm. “Janë vetëm disa momente, pikërisht ato duhet t’i përmirësojmë. Ka raste kur ua dhurojmë golat kundërshtarëve, përndryshe ata nuk do të kishin shënuar. Nëse arrijmë t’i rregullojmë këto gjëra, do të kemi bërë një hap të madh përpara. Kishte shumë aspekte pozitive në paraqitjen tonë. Mendoj se ishim më të mirë, por pranimi i këtyre golave nuk na ndihmon aspak”, shtoi trajneri. Ndonëse e cilësoi si shqetësues numrin e lartë të golave të pësuar si pasojë e pakujdesive të vetë lojtarëve, Carrick vlerësoi lart karakterin dhe qasjen sulmuese të ekipit të tij. “Janë shumë gola, kjo është e qartë. Duhet të bëjmë diçka për këtë. Por më pëlqeu karakteri i ekipit dhe cilësia e lojës sonë. Për pjesën më të madhe të ndeshjes sulmuam zonën kundërshtare, goditëm portën dhe krijuam raste. Ishim në disavantazh 0-2 pas një serie rezultatesh të dobëta, por lojtarët luajtën mirë dhe ushtruan presion”, deklaroi ai. Në lidhje me mbështetjen e tifozëve, ai u shpreh se pavarësisht pakënaqësisë dhe zhgënjimit të tyre, ata nuk reshtën së duartrokituri dhe mbështeturi skuadrën deri në sekondat e fundit. Në pyetjen përfundimtare nëse Manchester United rrezikon të përfshihet në luftën për mbijetesë këtë edicion, Carrick u përgjigj prerazi: “Jemi në nëntor. Nuk më pëlqen pozita në të cilën ndodhemi, por ende ka shumë gjëra që mund të bëjmë për ta ndryshuar këtë situatë”.