Superliga e Basketbollit: Vllaznia kryeson e qetë, Teuta mposht Tiranën dhe ndjek kreun

Kampionati i Superligës së basketbollit për meshkuj ka vijuar me emocione të reja, ku Vllaznia ka konfirmuar edhe një herë formën e shkëlqyer, duke regjistruar suksesin e pestë radhazi dhe duke nisur shkëputjen në krye të renditjes. Në sfidën e vlefshme për javën e pestë, kuqeblutë shkodranë triumfuan bindshëm me shifrat 97-66 në transfertën ndaj Flamurtarit në Vlorë. Përballja foli plotësisht në favor të miqve, të cilët dominuan parketin, ndërsa protagonist absolut u bë lojtari Hibbitt, autor i 22 pikëve. Një tjetër fitore e thellë u regjistrua nga Teuta, e cila triumfoi në palestrën e saj përballë një kundërshtari pretendent si Tirana, skuadër që po kalon një periudhë jo të mirë këtë edicion. Durrsakët morën kontrollin e lojës që në fraksionin e parë të sfidës dhe nuk e vunë në asnjë moment në dyshim triumfin e merituar, ku spikati performanca e Glynn, i cili shënoi 23 pikë. Ndërkohë, Kamza Basket ka përmbushur objektivin para publikut të saj, duke regjistruar një fitore të sigurt 87-67 kundër Pogradecit. Edhe pse takimi pati një nisje të ekuilibruar, vendasit morën shpejt frenat e lojës në dorë dhe ndërtuan një avantazh të qëndrueshëm hap pas hapi. Për kamzalinjtë, lojtari Mohammed ishte më i dalluari në fushë me 24 pikë të realizuara. Në qytetin e Fierit, Apolonia nuk fali aspak ndaj Elbasanit, duke e mbyllur ndeshjen me rezultatin e thellë 116-74 në një duel që pati pak hapësirë për surpriza. Epërsia e fierakëve ishte e dukshme që në nisje dhe u rrit ndjeshëm minutë pas minute. Veçori e kësaj ndeshjeje ishte kontributi i madh i tre lojtarëve të Apolonise, të cilët realizuan secili mbi 23 pikë, duke mbledhur plot 73 pikë së bashku. Rezultatet e javës së 5-të në Superligën e Meshkujve: Flamurtari – Vllaznia, 66-97 Apolonia – Elbasani, 116-74 Kamza Basket – Pogradeci, 87-67 Partizani – Skënderbeu, 9 nëntor Renditja e ekipeve pas pesë javëve të para: Vllaznia 10 pikë, Teuta 9 pikë, Kamza Basket 8 pikë, Besëlidhja 7 pikë, Apolonia 7 pikë, Tirana 6 pikë, Skënderbeu 6 pikë, Partizani 5 pikë, Elbasani 5 pikë, Pogradeci 5 pikë, Flamurtari 5 pikë.