Kanosja ndaj kryetarit të Vitisë: Policia vë n’pranga autorin e dyshuar

Uniformat blu kanë neutralizuar dhe arrestuar personin e dyshuar, i cili përmes platformave digjitale kishte lëshuar kërcënime të vazhdueshme ndaj kryetarit të Komunës së Vitisë, Sokol Haliti. Lajmin rreth prangosjes së këtij të fundit e ka bërë të ditur për portalin tonë Valon Osmani, zëdhënës zyrtar i Policisë së Kosovës për rajonin e Gjilanit. Sipas autoriteteve policore, i dyshuari me shtetësi kosovare ka përdorur rrjetet sociale për të ushtruar kanosje të përsëritura në drejtim të kreut të komunës. Në fund, pas përfundimit të procedurave të intervistimit dhe me urdhër të prokurorit të rastit, i dyshuari është ndaluar dhe dërguar në qendrën e mbajtjes.