Alarm te Bayerni: Neuer shkruan historinë, por dëmtimi i rëndë e lë jashtë fushave

Portieri veteran Manuel Neuer do t'i mungojë sërish gjigantit bavarez. Gjatë kësaj të diele, klubi i Bayern Munichut ka konfirmuar zyrtarisht se 40-vjeçari ka pësuar një këputje të pjesshme të tendines në këmbën e tij të djathtë. Edhe pse drejtuesit e klubit nuk kanë specifikuar një periudhë kohore për kohëzgjatjen e rikuperimit, duke u mjaftuar me deklaratën se ai do të mungojë “për momentin”, e përditshmja e njohur gjermane Bild bën të ditur se ky lëndim mund ta mbajë atë larg fushave të blerta deri në dy muaj. Ngjarja e pakëndshme ndodhi të shtunën gjatë sfidës ndaj Mainzit, e cila u mbyll me fitoren 2-1 në favor të bavarezëve. Neuer u detyrua të braktisë takimin ende pa përfunduar pjesa e parë, pasi mori ndihmën e parë mjekësore në fushë. Stafi mjekësor u detyrua t'i hiqte këpucën dhe çorapën e djathtë, ndërkohë që nën traversë u aktivizua zëvendësuesi i tij, Jonas Urbig. Ky incident fshiu festën për kapitenit bavarez, i cili në moshën 40-vjeçare e 225 ditë kishte thyer një rekord historik, duke u shndërruar në futbollistin më të moshuar që luan qoftë edhe një ndeshje të vetme në Bundesliga me fanellën e Bayernit. Në mungesë të veteranit, portieri Jonas Urbig — i cili numëron tetë paraqitje zyrtare këtë edicion — pritet të jetë zgjedhja parësore për të mbrojtur portën e skuadrës në takimet e ardhshme, derisa Neuer të jetë plotësisht i gatshëm. Goditja vjen në një kohë tejet të papërshtatshme, vetëm pak ditë pas rikthimit të tij në fushë kundër Atletico Madridit (0-2). Vetë gardiani kishte pranuar më parë se vetëm gjatë seancës stërvitore të nxehjes kishte kuptuar se ishte në gjendje të luante, pas një periudhe sfiduese me shqetësimet fizike. Të dhënat tregojnë një statistikë shqetësuese për vitin 2026, gjatë të cilit Neuer është detyruar të lërë fushën e lojës në katër ndeshje të kampionatit gjerman për shkak të dëmtimeve. Një frekuencë e tillë e lartë e largimeve të detyruara brenda një viti kalendarik është regjistruar vetëm dy herë të tjera në gjithë karrierën e tij të pasur.