Zinedine Zidane thur elozhe për talentin e Paris Saint-Germain: Më kujton lojën e lirë të lagjes

Ish-legjenda e kombëtares franceze të futbollit, Zinedine Zidane, ka ndarë mendimet e tij pozitive rreth aftësive të futbollistit të Paris Saint-Germain, Desire Doue, duke vënë in-focus stilin e tij unik të lojës dhe mentalitetin fitues që e dallon në fushë. Sipas tij, qasja e të riut është freskuese dhe mjaft tërheqëse për këdo që e do futbollin e bukur. "Ai nuk e komplikon lojën, luan sikur të ishte në lagjen e tij dhe mua më pëlqen shumë ky qëndrim i lirshëm", u shpreh Zidane, duke e krahasuar natyrshmërinë e tij me futbollin e pastër e spontan të fëmijërisë. Ndërkohë, ish-strategu i Real Madridit ka vënë theksin edhe te karakteri i futbollistit, duke veçuar dëshirën e tij të madhe për të mësuar dhe për t'u zhvilluar çdo ditë e më shumë, pavarësisht se tashmë ka treguar cilësi të larta në fushën e blertë. "Ajo që më pëlqen veçanërisht tek ai është se është i hapur ndaj këshillave. Është një lojtar i ri shumë i mirë, që bën gjëra të jashtëzakonshme, por që vazhdimisht i thotë vetes se mund të përmirësohet", deklaroi Zidane, duke paralajmëruar një të ardhme të ndritur për talentin francez.