Beteja për finalen e Botërorit 2030: Spanja kërcënon me tërheqje nëse ndeshja vendimtare i kalon Marokut

Organizimi i Kupës së Botës 2030 po shndërrohet me shpejtësi në një përplasje të ashpër politike dhe diplomatike ndërmjet Spanjës dhe Marokut, duke vënë në pikëpyetje fatin e finales së madhe. Garë për pritjen e aktit kulmor të këtij eventi madhështor futbollistik ka marrë tjetër rrjedhë, pasi kandidati për kryeministër të Spanjës, Alberto Núñez Feijóo, ka lëshuar një paralajmërim të prerë se shteti i tij mund të tërhiqet nga organizimi i përbashkët nëse vendimi përfundimtar favorizon Marokun për ndeshjen finale. Tensionet e hershme dypalëshe, të cilat prekin edhe çështje të ndjeshme si kriza humanitare në Ceuta, tashmë janë reflektuar hapur në debatin rreth këtij kompeticioni global. Kreu i Partisë Popullore spanjolle mbron qëndrimin se Spanja dhe Portugalia ishin iniciatoret e projektit origjinal, kurse Maroku iu shtua më vonë kësaj nisme, çka sipas tij i jep të drejtën legjitime Spanjës për të pritur duelin përfundimtar. Megjithatë, sfida i ka kaluar përmasat e politikës, pasi në garë janë përfshirë tri impianca monumentale futbolli, ku secila synon me çdo kusht të kurorëzojë kampionët e rinj të botës. Spanja mbështet ambiciet e saj te dy stadiumet e njohura, “Santiago Bernabéu” i Real Madridit dhe “Camp Nou” i rikonstruktuar i Barcelonës. Në krahun tjetër, Maroku ka vënë baste të larta te stadiumi krejtësisht i ri “Hassan II” në Casablanca, i cili projektohet të ketë një kapacitet prej plot 115 mijë shikuesish. Me këto përmasa, ky impiant afrikan do të linte pas “Camp Nou”-n, që pritet të ketë rreth 105 mijë ulëse pas ripunimeve, si dhe “Santiago Bernabéu”-n, i cili numëron afërsisht 83 mijë vende. Kujtojmë se edicioni i vitit 2030 do të shtrihet në tri shtete: Spanjë, Marok dhe Portugali. Në ndarjen e deritanishme, Spanja do të sigurojë 11 stadiume, Maroku gjashtë dhe Portugalia tri, ndërsa pyetja se cila prej tyre do të presë finalen mbetet nyja më e diskutueshme e gjithë projektit. FIFA ende nuk ka dhënë një verdikt zyrtar për këtë çështje, vendim që pritet të vuloset në mbledhjet e ardhshme të shtëpisë botërore të futbollit.