Triumf i madh në Gostivar: Elezi dhe Demiri ngjisin Shkëndijën e Haraçinës

Shkëndija e Haraçinës karegjistruar një fitore mjaft të rëndësishme në transfertë, pasi ka mposhtur Arsimin në Gostivar me rezultatin e pastër 0:2, në kuadër të javës së 13-të të Kampionatit të Maqedonisë së Veriut. Formacioni mysafir shfaqi një paraqitje të nivelit të lartë, duke ruajtur ekuilibrin mes mbrojtjes dhe sulmit, ndërkohë që tregoi efikasitet maksimal për të kapur tri pikët e radhës. Zhbllokimi i rezultatit erdhi menjëherë në startin e pjesës së dytë, saktësisht në minutën e 47-të, kur talenti dhe reprezentuesi i ri, Dashmir Elezi, tundi rrjetën për t'i dhënë epërsinë skuadrës së tij. Pas disavantazhit, ekipi vendas u përpoq të reagojë dhe u lëshua në ofensivë për të barazuar shifrat, mirëpo i mungoi saktësia në finalizim. Vendasit e Arsimit patën mundësinë e artë për të barazuar me anë të Gajes, i cili goditi nga afër portën e Stolevskit, por fati ishte me mysafirët pasi topi u ndal vetëm nga shtylla tërthore. Në minutat e fundit të sfidës, gjatë një harkimi të tentuar nga Ariton Memed, topi preku në dorë mbrojtësin kundërshtar, El Haxhi Gaje. Pas shqyrtimit të situatës përmes sistemit VAR, arbitri kryesor tregoi nga pika e bardhë e penalltisë. Përgjegjësinë e ekzekutimit e mori kapiteni Besir Demiri, i cili në minutën e 86-të u tregua i pagabueshëm, duke realizuar golin e dytë dhe duke vulosur përfundimisht fatin e këtij takimi. Falë këtij suksesi, Shkëndija e Haraçinës ngjitet në kuotën e 18 pikëve, duke kapur vendin e pestë në tabelë, ndërsa Arsimi mbetet në zonën e rrezikut, në pozitën e parafundit me vetëm 10 pikë të tubuara.