Sukses historik në Azi: Futbollisti shqiptar ngre lart trofeun e kampionit në Kinë

Futbollisti shqiptar Isnik Alimi ka shkruar emrin e tij në histori, pasi është shpallur kampion i Kinës me skuadrën e Dalian Yingbos, duke regjistruar kështu një nga arritjet më të mëdha në karrierën e tij sportive. Në duelin e fundit të sezonit, Alimi u aktivizua nga minuta e parë, ndërsa Dalian Yingbo arriti një fitore bindëse me shifrat 3:1 ndaj Tianjin Jinmen Tigers. Ky triumf i jep Dalian Yingbos titullin e parë kampion në historinë e klubit, pas një epilogu tejet dramatik të garës. Ekipi i Chengdu Rongcheng, i cili mbante kryesimin para ndeshjeve të xhiros së fundit, u mposht me rezultatin 3:2 nga Shandong Taishan, ndonëse i duhej vetëm një barazim për të siguruar kurorën e më të mirit. Veçori e këtij suksesi të jashtëzakonshëm është ngritja spektakolare e Dalianit, që arriti të përmbysë një diferencë prej 14 pikësh në pesë javët e fundit të kampionatit, sipas të dhënave të agjencisë “Associated Press”. Në krahun tjetër, Chengdu dështoi të shijojë fitoren në pesë sfidat e fundit, duke arkivuar katër humbje dhe vetëm një barazim, gjë që i dha mundësi Dalianit të realizojë përmbysjen e madhe në tabelë. Mesfushori 32-vjeçar, Isnik Alimi, ka qenë një nga shtyllat kryesore të skuadrës së Dalianit përgjatë gjithë edicionit, duke dhënë një kontribut të pazëvendësueshëm për këtë arritje historike të klubit. Pavarësisht formës së shkëlqyer në futbollin kinez, Alimi aktualisht mbetet jashtë planeve të Kombëtares së Maqedonisë së Veriut. Ai ishte një lojtar kyç gjatë periudhës së ish-përzgjedhësit Blagoja Milevski, mirëpo me ardhjen e trajnerit të ri Goce Sedloski, ai nuk është grumbulluar në dy dislokimet e fundit, duke munguar gjithashtu edhe për ndeshjet e muajit nëntor. Megjithatë, ky triumf mbetet një faqe e ndritur në karrierën e Isnik Alimit, i cili tashmë e ka shkruar emrin e tij në histori si kampion i Kinës me fanellën e Dalian Yingbos.