Arsimi kërkon kthesën ndaj Shkëndijës së Haraçinës: Jemi gati për tri pikët

Skuadra e Arsimit do të zbresë sot në fushë për një duel vendimtar në kampionat, ku do të matë forcat me Shkëndijën e Haraçinës. Në prag të kësaj sfide të rëndësishme, futbollisti Ebrima Gaye ka ndarë pritshmëritë dhe atmosferën brenda grupit. Lojtari ka pranuar se në radhët e ekipit ka ndjenja zhgënjimi pas dy disfatave radhazi të pësuara nga Bregallnica dhe Bashkimi. Megjithatë, ai ka nënvizuar se morali në skuadër mbetet i lartë dhe se të gjithë futbollistët janë të përkushtuar për të lënë pas rezultatet negative. “E dimë se rezultatet në ndeshjet e fundit nuk kanë qenë në favorin tonë, por po punojmë shumë dhe besojmë në cilësitë tona. Sot kemi një mundësi të re për të treguar karakterin dhe për t’u rikthyer me rezultat pozitiv“, deklaroi Gaye. Duke analizuar përballjen e sotme kundër Shkëndijës së Haraçinës, ai ka bërë të qartë se ambicia e vetme e Arsimit është triumfi dhe arkëtimi i tri pikëve të plota. “Na pret një ndeshje e vështirë, por jemi të përgatitur të japim maksimumin. Duhet të jemi të përqendruar nga minuta e parë deri në të fundit. Synimi ynë i vetëm sot është fitorja dhe rikthimi në rrugën e fitoreve“, u shpreh Gaye.