Magjia e Lionel Messit nuk ka të ndalur: Argjentinasi vendos një tjetër rekord të jashtëzakonshëm në MLS

Lionel Messi vazhdon të lërë gjurmë të pashlyeshme në futbollin e Shteteve të Bashkuara të Amerikës, duke rrëmbyer Këpucën e Artë në MLS për të dytin vit radhazi. Futbollisti gjeni i Inter Miamit e mbylli sezonin e rregullt 2026 në krye të listës së golashënuesve më të mirë të kampionatit, pasi tundi rrjetën 26 herë gjatë 31 paraqitjeve. Falë këtij suksesi, kapiteni argjentinas shkruan emrin e tij në librat e historisë si futbollisti i parë ndonjëherë në MLS që fiton Këpucën e Artë në dy edicione rresht. Ndërkohë, në vendin e dytë dhe të tretë për këtë vit u pozicionuan respektivisht Petar Musa i Dallasit me 22 realizime dhe Sam Surridge i Nashville me 21 të tilla. Megjithatë, ambicia dhe rekordet e ish-sulmuesit të Barcelona-s nuk mbyllen me kaq. Ai bëhet vetëm garuesi i dytë në historinë e kompeticionit që arviti të shënojë nga të paktën 25 gola në dy sezone të njëpasnjëshme. Në harkun e dy viteve të fundit, Messi ka arkivuar plot 55 gola, një shifër e cila e vendos menjëherë pas Josef Martinez, i cili mban rekordin me 58 gola të shënuar mes viteve 2018 dhe 2019. Duke parë ecurinë e tri sezoneve të fundit, 39-vjeçari ka arritur të shënojë 75 gola në sfidat e rregullta të kampionatit, duke regjistruar ecurinë e dytë më të mirë në historinë e MLS-së për këtë hark kohor. Për më tepër, ylli i fushës u shndërrua në lojtarin e dytë, pas Denis Bouanga, që arrin shifrën prej të paktën 20 golave në tri sezone radhazi, duke dëshmuar një formë fizike dhe efikasitet të frikshëm. Statistikat bëhen edhe më mbresëlënëse kur analizohet ndikimi i tij i drejtpërdrejtë në fazën sulmuese. Messi është lojtari i parë në historinë e këtij kampionati që arrin shifrën prej 40 ose më shumë kombinimesh mes golave dhe asistimeve përgjatë dy sezoneve rresht. Gjatë edicionit 2026, ai gjeneroi gjithsej 43 kontribute direkte për skuadrën e tij, duke shënuar kështu performancën e tretë më të lartë në historinë e ligës brenda një sezoni të vetëm. Në total, gjatë tri sezoneve të fundit, sulmuesi argjentinas ka regjistruar një shifër marramendëse prej 127 golash dhe asistimesh, duke lënë pas me një diferencë të ndjeshme Evanderin, i cili ka kontribuar me 98 të tilla në periudhën 2024-2026.