Nga dështimet te menaxhimi i krizave: Gjermania analizon gabimet e përballjes me COVID-19 në Bundestag

Parlamenti gjerman (Bundestagu) ka ngritur një komision të posaçëm me qëllim analizimin e përvojave dhe mbledhjen e opinioneve të ekspertëve mbi menaxhimin e pandemisë së COVID-19. Gjatë këtij procesi janë vënë në pah lëshime të shumta: nga zbatimi i masave që qytetarëve u dukeshin plotësisht të pakuptimta, e deri te rastet ku fondet publike u keqpërdorën apo përfunduan te persona me prapavijë të dyshimtë. Trupa hetuese përbëhet nga specialistë të fushës së shkencës dhe medias, të propozuar nga grupet e ndryshme parlamentare. Në seancën dëgjimore, profesori i psikologjisë sociale, organizative dhe ekonomike në Universitetin e Erfurtit në landin e Turingisë, Tilman Betsch, vuri në dukje marrëdhënien jo të shëndetshme mes shkencës dhe politikës. Ai e nisi fjalën me një koment kritik ndaj ish-presidentit amerikan Donald Trump, duke u shprehur i kënaqur që jeton në një shtet ku drejtuesit dëgjojnë shkencëtarët dhe nuk sugjerojnë dezinfektuesin si kurë. “Kur makina ime prishet, unë konsultohem me një automekanik. Kur jam i sëmurë, konsultohem me mjekun tim”, tha ai. Megjithatë, Betsch nënvizoi se në Gjermani u tejkaluan kufijtë, pasi u mjegullua se kush i merrte vendimet përfundimtare. Sipas tij, politikanët ia deleguan përgjegjësinë shkencës për t'iu shmangur llogaridhënies. Ai paralajmëroi se menaxhimi iu afrua kaosit për shkak të neglizhimit të socializimit të fëmijëve, arsimit dhe ekonomisë, ndërsa këshilloi që në të ardhmen shkenca t'u përmbahet vetëm fakteve pa ushtruar ndikim moral apo normativ. Nga ana tjetër, gazetari dhe studiuesi i medias Michael Meyen përqendroi kritikën te roli i mjeteve të informimit gjatë krizës shëndetësore. Ai i akuzoi mediat se u shndërruan në një makineri propaganduese pro vaksinimit, duke mbjellë frikë te publiku dhe duke vënë në dyshim legjitimitetin e protestave apo shqetësimeve qytetare. Meyen, i cili u pensionua para kohe në mars të vitit 2026 nga Universiteti 'Ludwig Maximilian' i Mynihut pas 24 vitesh si ligjërues për shkak të qëndrimeve të tij polemizuese, ngriti kritika edhe në deklaratën e tij me shkrim. Ai përmendi transmetimin pa filtër kritik të të dhënave mbi kapacitetet e reparteve të kujdesit intensiv, mënyrën e përhapjes së virusit dhe bazën shkencore të distancimit fizik. Ndërkaq, eksperti i komunikimit nga Universiteti i Mainzit, Marcus Maurer, argumentoi se raportimet mediatike shpesh u nxorrën nga konteksti. “Çdo ditë dëgjonim sa njerëz kishin vdekur nga koronavirusi, por rrallëherë jepeshin shifra krahasuese. Sa njerëz vdesin nga gripi? Sa nga kanceri i mushkërive? Vetëm atëherë mund ta vendosnim situatën në një kontekst realist”, deklaroi ai. Maurer përmendi edhe pengesat strukturore në redaksitë gjermane, të cilat u përballën me nevojën për të mbuluar një temë mjaft komplekse në kushtet e mungesës së kohës dhe ekspertizës së duhur, gjë që rriti varësinë e tyre nga burimet zyrtare.