Superderbi i La Ligës: Atletico Madrid dhe Barcelona përplasen sot, fjalët e Simeones dhe Flick para supersfidës

Kryendeshja e kësaj jave në La Liga sjell përballjen spektakolare mes Atletico Madridit dhe Barcelonës, e cila do të zhvillohet të dielën në stadiumin “Metropolitano”. Në prag të këtij takimi vendimtar, trajneri i Atletico Madridit, Diego Simeone, ka thurur eloge për kundërshtarin, duke e etiketuar Barcelonën si ekipin më në formë të momentit. “Pa asnjë dyshim, përballë kemi skuadrën më të mirë. Mendoj se mbrojtësit tanë nuk kanë nevojë për motivim shtesë, pasi i gjithë ekipi duhet të jetë i përgatitur për t’u përballur me lojtarë si Lamine Yamal dhe Raphinha”, deklaroi Simeone. Në kampin tjetër, strategu i Barcelonës, Hansi Flick, ka shprehur hapur ambicjen për të arkëtuar tri pikët e plota nga ky udhëtim tejet sfidues. Tekniku gjerman pranon se ekipin e tij e pret një mision i ndërlikuar, mirëpo objektivi mbetet i pandryshuar: triumfi dhe konsolidimi i kryesimit në tabelën e klasifikimit. “Besoj se do të kemi një ndeshje të vështirë, por dëshiroj tri pikët. Për Barcelonën do të ishte shumë e rëndësishme që pushimin për ndeshjet e kombëtareve ta presim si lider i kampionatit”, u shpreh Flick. Dueli i së dielës pritet të shërbejë si një provë e zjarrtë për ambiciet e të dyja ekipeve në luftën e ashpër për kreun e elitës së futbollit spanjoll.