Zanfina Ismaili rrëfen ferrin e bullizmit: Përjetova sulme nga kolegët dhe ish-misat

Këngëtarja e njohur shqiptare, Zanfina Ismaili, ka adresuar përmes rrjeteve sociale dukurinë e shëmtuar të bullizmit, paragjykimeve dhe mentalitetit shoqëror, duke lëshuar akuza të ashpra për mënyrën se si individët paragjykojnë dhe trajtojnë njëri-tjetrin. Ajo ka theksuar se shoqëria jonë vazhdon të vuajë nga bullizmi, paragjykimet dhe intriga, ndërsa procesi i vetëdijesimit dhe shkëputja nga mentaliteti primitiv mbeten ende sfida tejet të vështira. "Na jena popull bullizus, paragjykus dhe intriganta. Me seksualitet ja kemi kalu edhe Evropës, po kur bohet fjalë për vetëdijesim, civilizim edhe me dal prej mentalitetit primitiv, na konkretisht n'kohë t'gurit jena", ka shkruar ajo në llogarinë e saj në InstaStory. Artistja ka shtuar se askush nuk është i detyruar t'i durojë sjellje të tilla toksike, duke shtruar njëkohësisht pyetjen se përse njerëzve u duhet të brengosen kaq shumë rreth mendimeve dhe komenteve të të tjerëve. Ajo ka vënë inatin te fakti se nuk çdo përvojë e jetës duhet domosdoshmërisht të ekspozohet publikisht, duke kundërshtuar qasjen se individët duhet t'i bëjnë publike plagët emocionale, gjendjen e depresionit apo pasiguritë vetëm për të tërhequr vëmendje. Zanfina ka ndarë me ndjekësit faktin se ajo vetë ka qenë shpesh shënjestër e bullizmit digjital, duke përmendur komente dashakeqëse nga profile anonime, njerëz nga rrethi i saj shoqëror, ish-kolegë, ish-misse dhe aktorë humori. Sipas saj, këto sulme virtuale zakonisht vijnë nga individë që nuk i kanë zgjidhur dot traumat dhe pasiguritë e tyre personale, ndërsa çdo tentativë për të lënduar dikë përmes fjalëve të ulëta nuk tregon gjë tjetër veçse dëshirën e tyre për t'u ndier superiorë për një çast të shkurtër. Në mbyllje të reagimit të saj, këngëtarja ka prekur edhe temën e vetëbesimit, duke nënvizuar rëndësinë që vetëvlerësimi të mos varet nga lëvdatat apo mendimet e personave që nuk kanë asnjë peshë apo rol domethënës në jetën tonë. Reagimi i interpretuesores së hitit "As i fundit, as i pari" vjen në një periudhë kur çështja e bullizmit është rikthyer fuqishëm në qendër të vëmendjes publike, si pasojë e diskutimeve të fundit të zhvilluara brenda shtëpisë së Big Brother VIP Kosova 5. Kujtojmë se një nga banorët e këtij spektakli kërkoi ndjesë publike gjatë transmetimit për angazhimin e tij në të kaluarën në një grup ku ishin bullizuar padrejtësisht shumë vajza, përfshirë këtu edhe emra të njohur të skenës.