Zhdukje misterioze në Austri: Vidhet helikopteri luksoz, gjurmët humbasin mbi detin Adriatik

Një ngjarje e rrallë dhe tronditëse ka ndodhur në Salzburg të Austrisë, ku një helikopter me vlerë qindra mijëra euro është grabitur nga një hangar i siguruar. Mjeti fluturues, i cili mirëmbahet nga ish-kampioni i kërcimeve me ski, Thomas Morgenstern, ka bërë që autoritetet të nisin një operacion të gjerë kërkimi. Sipas informacioneve zyrtare, incidenti ka ndodhur në Mauterndorf të Lungaut, ku persona ende të paidentifikuar kanë depërtuar me forcë në ambientet e aeroportit dhe kanë arritur të marrin helikopterin e tipit "Robinson R44". Mjeti është në pronësi të biznesmenit Manuel Aster nga Wagrain, ndërsa proceset teknike dhe mirëmbajtja e tij kryheshin nga Morgenstern. Në operacionin e kërkimit janë përfshirë forcat policore, ushtria austriake dhe agjencia e kontrollit ajror, "Austro Control". Zëdhënësja e policisë, Valerie Bachler, konfirmoi se hetimet janë në fazën më intensive, ndërsa po shqyrtohen të gjitha pistat e mundshme për të kuptuar se si u realizua kjo grabitje e sofistikuar. Nga ana tjetër, pronari i mjetit, Manuel Aster, ka bërë të ditur se sinjali i fundit i helikopterit është regjistruar të hënën, rreth orës 04:20 të mëngjesit, pranë ishullit Pag në Kroaci. Ai u ka bërë thirrje qytetarëve për bashkëpunim në rast se posedojnë informacione. Helikopteri i vjedhur dallohet për ngjyrën blu të errët, logon e markës "Breitling" dhe kodin e regjistrimit OE-XHK. Vlera e tregut e një mjeti të tillë llogaritet të jetë rreth 600,000 euro.