Sfidimi i Gjykatës Speciale: PDK kërkon ndryshime ligjore, Naim Miftari e quan 'humbje kohe'

Kuvendi i Kosovës ka ndërmarrë një hap të rëndësishëm këtë të hënë, duke miratuar me konsensus të plotë një deklaratë lidhur me vendimin e shkallës së parë të Dhomave të Specializuara të Hagës ndaj ish-krerëve të Ushtrisë Çlirimtare të Kosovës. Dokumenti, i prezantuar nga kryeparlamentarja Albulena Haxhiu, mori 99 vota pro, pa asnjë kundërshtim apo abstenim, duke gjetur mbështetjen e Lëvizjes Vetëvendosje, PDK-së, LDK-së, AAK-së dhe grupeve parlamentare multietnike. Paralelisht me këtë akt, në sallën e Kuvendit është rihapur debati për mundësinë e ndryshimit të ligjit mbi Dhomat e Specializuara. Nisma, e ndërmarrë nga Partia Demokratike e Kosovës pas dënimeve të rënda me total 81 vite burgim për Hashim Thaçin, Jakup Krasniqin, Kadri Veselin dhe Rexhep Selimin, synon kufizimin e juridiksionit të këtij institucioni. Propozimi i PDK-së parasheh që veprimtaria e Gjykatës të fokusohet vetëm te pretendimet nga raporti i vitit 2011 i Këshillit të Evropës, si dhe të ngushtojë periudhën kohore të mandatit të saj nga janari 1998 – dhjetor 2000, në periudhën 1 korrik 1999 – dhjetor 2000. Po ashtu, kërkohet që dënimi maksimal të kufizohet në 15 vite, vuajtja e dënimit të kryhet në Kosovë dhe të krijohet mundësia e faljes presidenciale. Derisa Aleanca për Ardhmërinë e Kosovës i ka dhënë mbështetje kësaj nisme, Lëvizja Vetëvendosje ka bërë të ditur se do të analizojë me kujdes aspektet juridike të propozimit. Nga ana tjetër, Lidhja Demokratike e Kosovës ende nuk ka dalë me një qëndrim zyrtar. Në lidhje me këto zhvillime, ish-eprori i UÇK-së dhe ish-agjenti i SHIK-ut, Naim Miftari, ka shprehur skepticizëm të lartë. Ai e konsideron deklaratën e miratuar si një veprim folklorik dhe të pafrytshëm. Sipas tij, Specialja nuk mund të zhbëhet pa një marrëveshje formale me Bashkimin Evropian dhe Shtetet e Bashkuara të Amerikës. “Kjo është vetëm humbje kohe. PDK-ja, si përgjegjësja kryesore për krijimin e kësaj gjykate, po përpiqet të lajë duart si Pilati. Nuk mund të ketë amnisti presidenciale me ligjet aktuale, dhe koha kur individët kishin fuqi absolute për të ndikuar në drejtësi ka perënduar”, deklaroi Miftari. Sa i përket akuzave se kjo gjykatë ka ndikime serbe apo ruse, Miftari sugjeron që fokusi duhet të jetë te apelimi i vendimeve. Ai nënvizon se rrëzimi i akuzave për krime kundër njerëzimit është një zhvillim pozitiv, duke shtuar se deputetët që votuan dikur për themelimin e këtij institucioni mbajnë përgjegjësinë e tyre historike.