Raporti i Auditimit për Vitin 2025: ZKA Identifikon 77.4 Milionë Euro Shpenzime të Keqklasifikuara nga Qeveria

Auditorja e Përgjithshme e Kosovës, Vlora Spanca, ka shpalosur përpara Kuvendit raportin vjetor të auditimit për vitin 2025, duke u ndalur te një sërë pikash kritike dhe mangësish që lidhen me menaxhimin e parasë publike në vend. Gjatë fjalës së saj, Spanca sqaroi se Zyra Kombëtare e Auditimit i ka dhënë opinion të kualifikuar raportit vjetor financiar të ekzekutivit për vitin 2025. Ky vlerësim nënkupton se, me gjithë përmirësimet në disa fusha, pasqyrat financiare në tërësi japin një pamje reale në rrafshin material, por me parregullsi që prekin saktësinë e zërave specifikë buxhetorë. Sipas të dhënave zyrtare, një prej problemeve kryesore është keqklasifikimi i shpenzimeve në një vlerë prej 77.4 milionë eurosh. Nga kjo shumë, 58.5 milionë euro janë ekzekutuar përmes vendimeve gjyqësore nga linja jo adekuate buxhetore, ku pjesa më e madhe i përket përmbushjes së detyrimeve nga kontratat kolektive në nivel komunal. Po ashtu, 14.4 milionë euro rrjedhin nga keqklasifikimet direkte të vetë organizatave buxhetore, ndërsa 4.5 milionë euro të tjera lidhen me planifikime jo adekuate. Raporti nxjerr në pah gjithashtu fryrjen e pasurive shtetërore me 33.5 milionë euro, nënvlerësimin e llogarive të arkëtueshme me 4.4 milionë euro, si dhe mbivlerësimin e detyrimeve të papaguara me 2.8 milionë euro. Po ashtu, detyrimet kontingjente dhe ato të zakonshme janë mbivlerësuar me rreth 30 milionë euro. “Këto çështje tregojnë se pavarësisht arritjeve, nevojitet forcimi i kontrolleve të brendshme”, deklaroi Spanca. Ajo gjithashtu ngriti shqetësimin për vonesat e theksuara në jetësimin e projekteve, çka ka ardhur si pasojë e luhatjes së çmimeve në treg dhe planifikimeve të dobëta institucionale. Në rrafshin e arkëtimeve dhe shpenzimeve, të hyrat buxhetore gjatë vitit 2025 kapërcyen shifrën e 3 miliardë e 512 milionë eurove, duke shënuar një rritje prej 9 për qind krahasuar me vitin 2024. Me të njëjtin ritëm rritjeje prej 9 për qind u zhvilluan edhe shpenzimet, ku nga buxheti përfundimtar prej 3 miliardë e 848 milionë eurosh u realizua 91 për qind e tij. Sa i përket deficitit buxhetor, Spanca konfirmoi se kufiri ligjor është respektuar: nga 224 milionë euro të planifikuara (rreth 2 për qind e BPV-së), deficiti përfundimtar u ndal në 7.8 milionë euro apo 0.07 për qind të BPV-së. Borxhi shtetëror në fund të vitit 2025 arriti në 1.8 miliardë euro (një rritje prej 80.4 milionë eurosh apo 4.6 për qind), duke përfaqësuar 16.5 për qind të BPV-së, shifër kjo dukshëm nën tavanin ligjor prej 40 për qind. Dokumenti i prezantuar përmban dy shtylla kryesore: auditimin financiar të buxhetit qeveritar për vitin 2025 bashkë me rekomandimet përkatëse, si dhe rezultatet e auditimeve individuale për institucionet publike. paraprakisht, përpara nisjes së raportimit, shefi i Grupit Parlamentar të PDK-së, Arian Tahiri, kërkoi që prezantimi i Auditores së Përgjithshme të shtyhej.