Krizë financiare në Odën e Inxhinierëve: Pezullohen shërbimet, stafi pa paga prej muajsh

Oda e Inxhinierëve të Republikës së Kosovës (OIRK) ka marrë vendim për ndërprerjen e plotë të aktiviteteve dhe shërbimeve administrative. Ky veprim vjen si pasojë e bllokadës financiare, e cila ka lënë punonjësit e administratës pa paga që nga muaji korrik i këtij viti. Duke filluar nga data 5 nëntor 2026, dyert e këtij institucioni do të mbeten të mbyllura deri në momentin kur të sigurohen mjetet e nevojshme për funksionim. Ky vendim është marrë unanimisht nga Bordi Drejtues më 3 nëntor, ndërsa institucionet përkatëse, përfshirë Ministrinë e Mjedisit dhe Planifikimit Hapësinor, janë njoftuar zyrtarisht përmes shkresës me numër protokolli 639/26. Sipas dokumentacionit të siguruar, shkaku kryesor i kësaj situate është mosrealizimi i grantit të paraparë për vitin 2026, pavarësisht përpjekjeve të vazhdueshme dhe dokumentacionit të plotë të dorëzuar në ministri. Përveç pagave të stafit, mungesa e mjeteve ka pamundësuar kompensimin e kryetarit, anëtarëve të Bordit Drejtues dhe komisioneve të ndryshme. Inspektorati i Punës ka evidentuar parregullsi lidhur me këtë situatë përmes Raportit Zyrtar Nr. 1207-216/2026. Ky organ ka kërkuar shlyerjen e detyrimeve ndaj punonjësve brenda një afati tre-ditor, duke paralajmëruar përndryshe nisjen e procedurave kundërvajtëse në gjykatë. Greva e punonjësve, e paralajmëruar që nga tetori, është aktivizuar zyrtarisht pas dështimit për të gjetur një zgjidhje financiare. Kriza ka prekur edhe infrastrukturën teknologjike. Oda ka bërë të ditur se posta elektronike zyrtare rrezikon deaktivizimin më 12 nëntor, ndërsa prodhimi i licencave profesionale është ndërprerë për shkak të borxheve të akumuluara ndaj kompanive kontraktuese. Gjithashtu, institucioni përballet me detyrime të papaguara për shërbimet bazike si energjia elektrike dhe uji. Si pasojë e mungesës së buxhetit, Oda është detyruar të anulojë edhe pjesëmarrjen në Asamblenë e Përgjithshme të Këshillit Evropian të Odave të Inxhinierëve (ECEC) në Dubrovnik. OIRK thekson se ka ndjekur me përpikëri të gjitha procedurat burokratike dhe komunikimin institucional që nga tetori i vitit të kaluar, duke dorëzuar planet e shpenzimeve dhe draft-memorandumet e kërkuara nga Komisioni Ministror, mirëpo deri më tani, financimi ka mbetur i parealizuar.