Front opozitar kundër qeverisë, Berisha shtrin dorën e bashkëpunimit për Shehajn, Qorin dhe Lapajn

Kreu i Partisë Demokratike, Sali Berisha, ka adresuar sërish një thirrje publike për krijimin e një fronti të përbashkët opozitar. Në fokus të kësaj nisme janë drejtuesit e forcave të reja politike në vend, konkretisht Agron Shehaj, Arlind Qori dhe Adriatik Lapaj. Në qëndrimin e tij, Berisha ka shprehur gatishmërinë e plotë për të zhvilluar takime me çdo aktor politik që ka si objektiv parësor largimin e kryeministrit Edi Rama nga qeverisja. Sipas tij, përballë kësaj situate, paragjykimet politike duhet të mbeten në plan të dytë. “Unë shfrytëzoj sërish rastin dhe i ftoj që të bashkohemi. Bashkohem që nesër! Me cilindo që bashkohet, që të largojmë Ramën nga pushteti. Me cilindo njeri. Ne nuk ftojmë me paragjykime. Me të gjithë takohem, nuk kam asnjë lloj paragjykimi. Se çfarë më quajnë, rëndësi ka të largojmë të keqen më të madhe”, ka deklaruar lideri i demokratëve.