Brukseli vlerëson Maqedoninë e Veriut si partner të besueshëm, por kërkon reforma urgjente në media

Ambasadori i Bashkimit Evropian në Maqedoninë e Veriut, Michalis Rokas, ka vlerësuar lart angazhimin e vendit në rrugën drejt integrimit evropian. Gjatë një konference të përbashkët për media me kryeministrin Hristijan Mickoski, diplomati evropian theksoi se Shkupi ka dëshmuar përkushtim duke u bërë një partner i besueshëm i bllokut evropian dhe duke ndarë të njëjtat prioritete strategjike. Sipas Rokas, vendi ka shënuar përparim të ndjeshëm në harmonizimin e legjislacionit vendor me acquis të Bashkimit Evropian, duke u pozicionuar kështu si një prej shteteve kandidate që gëzon nivelin më të lartë të gatishmërisë për anëtarësim. Ky vlerësim vjen në kontekstin e publikimit të raportit të progresit të Komisionit Evropian për Maqedoninë e Veriut. Megjithatë, ambasadori Rokas nuk la pa përmendur sfidat që kërkojnë vëmendje, veçanërisht në fushën e lirisë së mediave. Ai nënvizoi nevojën për reforma të mëtejshme, duke kërkuar rishikimin e kuadrit ligjor aktual për ta përafruar atë me standardet e BE-së. Fokus i veçantë, sipas tij, duhet të jetë vendosja e mekanizmave për transparencë të plotë të pronësisë së mediave. Gjatë kësaj konference, ambasadorit iu drejtua një pyetje nga gazetarët lidhur me pretendimet për presion dhe kërcënime ndaj gazetarëve dhe stacioneve televizive kombëtare, çështje kjo që po shkakton pasiguri në mjedisin mediatik. Rokas konfirmoi se çështja e lirisë së shprehjes mbetet një prioritet ku duhet të bëhen hapa konkretë për përmirësim.