Debati në Itali: Kryeministrja Meloni mbron nismën për ndalimin e burkës në shkolla

Autoritetet në Itali po përgatisin një paketë të re masash që parashikon ndalimin e mbulesave që fshehin fytyrën, si burkat dhe nikabet, në të gjitha institucionet arsimore të vendit. Kjo nismë legjislative ka fituar mbështetjen e fuqishme të kryeministres italiane, Giorgia Meloni, e cila ka bërë të qartë se askush nuk duhet të detyrohet të maskojë fytyrën e tij. Projektligji bën pjesë në një strategji më të gjerë reformash të ndërmarra nga ekzekutivi italian, të cilat synojnë të përmirësojnë procesin e integrimit brenda sistemit arsimor kombëtar. Përveç heqjes së mbulesave të plota, plani qeveritar parashikon gjithashtu vendosjen e kufizimeve për përqindjen e nxënësve me origjinë të huaj brenda çdo klase mësimore. Duke arsyetuar këtë vendim, kryeministrja Meloni nënvizoi se një integrim i suksesshëm i fëmijëve dhe familjeve të tyre arrihet përmes përvetësimit të gjuhës italiane, si dhe respektimit të kulturës dhe rendit juridik të shtetit. Ajo shtoi se mbulimi total i fytyrës kundërshton parimet thelbësore të lirisë personale dhe të hapjes ndaj kulturave të tjera brenda hapsirave shkollore. Gjithsesi, autoritetet kanë sqaruar se ky kufizim nuk do të prekë shaminë tradicionale të kokës, pasi ai do të targetojë ekskluzivisht ato veshje që pamundësojnë njohjen e plotë të fytyrës. Këto qëndrime u bënë publike nga kreu i ekzekutivit gjatë një aktiviteti rinor të thirrur nga forca e saj politike, “Vëllezërit e Italisë” (Fratelli d’Italia), në një periudhë ku çështjet e migracionit dhe integrimit vazhdojnë të dominojnë skenën politike në vend.