Kriza në shkollën “Mehmet Gjevori”: Prindërit nisin bojkotin, Komuna premton zgjidhje për higjienën dhe ngrohjen

Këshilli i prindërve të shkollës fillore dhe të mesme të ulët “Mehmet Gjevori” ka njoftuar se ditën e nesërme nxënësit nuk do të vijojnë mësimin. Ky vendim vjen si shenjë proteste ndaj kushteve të rënduara në objektin shkollor, ku mungesa e higjienës dhe defektet në sistemin e ngrohjes e kanë bërë të pamundur zhvillimin normal të procesit edukativ. Vendimi për bojkot është marrë pas një votimi të organizuar mes përfaqësuesve të prindërve, të cilët kanë vlerësuar se gjendja aktuale rrezikon shëndetin e fëmijëve. Sipas Këshillit të Prindërve, situata e rëndë higjienike është pasojë e drejtpërdrejtë e grevës shtatëjavore të punëtorëve teknikë, ndërsa situata është përkeqësuar edhe më tej nga ndërprerja e ngrohjes, e cila nuk është riparuar pavarësisht insistimit të drejtorisë së shkollës. Në anën tjetër, Drejtoria e Arsimit në Prishtinë ka bërë të ditur se ka arritur një dakordim me sindikatën e punëtorëve grevistë. Sipas institucionit komunal, pagesat për punëtorët kanë filluar të ekzekutohen gjatë ditës së sotme, ndërsa pjesa tjetër e obligimeve financiare pritet të përmbyllet deri të martën, duke hapur rrugën për rikthimin e tyre në vendet e punës gjatë javës së ardhshme. Derisa shërbimet teknike të kthehen në normalitet, Komuna e Prishtinës ka angazhuar ndërmarrjet publike “Pastrimi” dhe Ndërmarrjen Publike Banesore për të siguruar mirëmbajtjen dhe pastrimin e hapësirave shkollore. Drejtoria e Arsimit ka theksuar se shëndeti dhe siguria e nxënësve mbeten prioritet absolut për ta. Përmes një komunikate, ata kanë bërë me dije se do të mbikëqyrin nga afër zbatimin e masave higjieno-sanitare, duke shtuar se, megjithëse synojnë vijimin e rregullt të mësimit, asnjë proces nuk mund të vendoset mbi mirëqenien e fëmijëve.