Goditje financiare rrjetit të drogës: Si pastroheshin 14 milionë euro përmes arit dhe pronave

Një operacion i gjerë ndërkombëtar, i koduar “Caveau 38”, ka shkatërruar një organizatë të fuqishme kriminale me bazë kryesisht shqiptare, e cila operonte në një aks të gjerë gjeografik që përfshinte Italinë, Holandën, Gjermaninë dhe Shqipërinë. Nën drejtimin e Drejtorisë Antimafia të Milanos dhe me angazhimin e Guardia di Finanza të Leccos, autoritetet kanë vënë në shënjestër një rrjet të sofistikuar që trafikonte lëndë narkotike dhe pastronte shuma marramendëse parash. Hetimet e udhëhequra nga prokurori i Milanos, Marcello Viola, kanë zbardhur mekanizmat e këtij grupi, i cili dyshohet se ka trafikuar rreth 240 kilogramë kokainë. Përfitimet financiare nga ky aktivitet, që kapin vlerën e mbi 14 milionë eurove, transferoheshin drejt Shqipërisë përmes metodave të ndryshme për të fshehur gjurmët e origjinës së tyre të paligjshme. Për të legjitimuar paratë e pista, organizata kishte ngritur një skemë komplekse përmes dy kompanive. Njëra prej tyre, e specializuar në përpunimin e metaleve të çmuara me seli në Milano dhe Alessandria, përdorej për blerjen e shufrave të arit. Hetuesit kanë dokumentuar blerjen e 8 kilogramëve ar, të cilat më pas transportoheshin përtej Adriatikut. Ndërkohë, kompania e dytë shërbente si një “kasafortë” për investime strategjike në pasuri të paluajtshme. Në kuadër të këtij operacioni, autoritetet italiane kanë vendosur sekuestro parandaluese mbi të dyja subjektet tregtare, ndërsa është emëruar një administrator gjyqësor për të garantuar vijimësinë e tyre ligjore. Në dosjen hetimore, që mbulon periudhën 2019-2022, figurojnë 52 persona nën hetim, ndërsa deri më tani janë ekzekutuar gjashtë arrestime. Anëtarët e këtij grupi përdornin teknologji të avancuar dhe aplikacione të koduara për të shmangur mbikëqyrjen e policisë gjatë koordinimit të trafikut të drogës. Gjatë hetimeve, përveç sekuestrimit të kompanive, policia ka gjetur 1.5 milionë euro cash dhe rreth 32 kilogramë lëndë të ndryshme narkotike, duke dhënë një goditje të rëndë strukturës financiare të këtij rrjeti kriminal.