Vijon zjarri masiv në kodrat me ullishta në Kreshpan të Fierit, era e fortë përkeqëson situatën, banorët: Mund të jetë i qëllimshëm

Zjarri vijon ende në kodrat e fshatit Kreshpan në Fier, ndërsa era e fortë favorizon përhapjen e flakëve. Zjarri po djeg sipërfaqe të mbjella me ullinj, si dhe zona me pyll me pisha, ndërsa për shkak të erës flakët janë drejtuar edhe në drejtim të kodrave të fshatit Vjosë. Banorët e zonës, të cilët po përpiqen të mbrojnë pronat e tyre, thonë se dyshojnë se zjarri mund të jetë i qëllimshëm dhe kërkojnë që autorët të identifikohen dhe të përgjigjen për dëmet e shkaktuara. Sipas banorëve, vetëm një fermer ka humbur qindra rrënjë ullinj, të cilat përbënin burimin kryesor të të ardhurave për familjen e tij. Në terren vijojnë të jenë forcat zjarrfikëse, të cilat po punojnë për izolimin dhe neutralizimin e flakëve, ndërsa situata mbetet e vështirë për shkak të erës. Ndërkohë, në kuadër të hetimeve për zjarrvënien, Policia e Fierit ka shoqëruar tre persona të dyshuar, ndërsa vijon puna për zbardhjen e plotë të rrethanave dhe përcaktimin e përgjegjësive.