Unitet përballë Hagës: Përparim Rama vlerëson qëndrimin unik të Kuvendit për ish-krerët e UÇK-së

Kryetari i Komunës së Prishtinës, Përparim Rama, ka mirëpritur vendimin e Kuvendit të Kosovës për miratimin e deklaratës lidhur me aktgjykimin ndaj ish-udhëheqësve të Ushtrisë Çlirimtare të Kosovës në Hagë. Sipas Ramës, bashkimi i spektrit politik rreth këtij dokumenti është një veprim tejet i rëndësishëm. Ai ka nënvizuar se në çështjet që prekin themelet e lirisë, sakrificën e popullit tonë dhe të vërtetën historike të shtetit, interesat partiake duhet të mbeten në plan të dytë përballë përgjegjësisë kolektive. Në reagimin e tij, i pari i kryeqytetit ka potencuar se drejtësia dhe mbrojtja e së vërtetës historike mbeten prioritet, duke shtuar se Kosova duhet të shfaqë një zë të vetëm dhe të palëkundur sa herë që vihen në dyshim vlerat mbi të cilat është ndërtuar liria e vendit.