Votimi nga orbitra: Astronautët e NASA-s marrin pjesë në zgjedhjet amerikane nga Stacioni Hapësinor

Edhe pse ndodhen qindra kilometra larg Tokës, tre astronautë amerikanë të Stacionit Ndërkombëtar Hapësinor (ISS) nuk e kanë lënë pa ushtruar të drejtën e tyre qytetare në zgjedhjet e mesmandatit në Shtetet e Bashkuara. Përmes një procesi të digjitalizuar, anëtarët e ekuipazhit kanë plotësuar fletëvotimet e tyre elektronike, të cilat më pas janë dërguar në mënyrë të sigurt dhe të enkriptuar drejt autoriteteve zgjedhore në Tokë. Astronauti Anil Menon ka ndarë këtë eksperiencë të veçantë me ndjekësit në platformën X, duke konfirmuar se procesi zgjedhor është i mundur edhe në kushtet e mikrogravitetit. Në një video të publikuar, ai ka prezantuar ambientin e tij të punës në stacion, i cili për një moment u shndërrua në një kabinë votimi private. “Kjo është dhoma ime, ku përmes kompjuterit arrita të plotësoja formularin elektronik dhe ta dërgoja për në Harris County. Është një privilegj i madh të kemi mundësinë të votojmë nga hapësira, njësoj si bashkëqytetarët tanë në Tokë”, ka deklaruar Menon, teksa shfaqte me krenari ngjitësen “Unë votova” të vendosur në kostumin e tij hapësinor. Praktika e votimit nga hapësira për astronautët e NASA-s është një mundësi e institucionalizuar që prej vitit 1997. Agjencia hapësinore amerikane garanton sigurinë e plotë të votës përmes transmetimit të enkriptuar të të dhënave. Kujtojmë se në këto zgjedhje të mesmandatit në SHBA janë në lojë të gjitha 435 vendet e Dhomës së Përfaqësuesve, si dhe 35 nga 100 vendet e Senatit amerikan.