Atletico Madrid nis kërkimin për gardianin e ri: Synimi është talenti gjerman Dennis Seimen

Drejtuesit e Atletico Madridit kanë hedhur hapat e parë drejt planifikimit të së ardhmes, duke nisur kërkimet për një pasues të denjë të Jan Oblakut. Edhe pse portieri slloven mbetet pjesë e skuadrës dhe është i lidhur me një kontratë deri në vitin 2028, klubi madrilen po vlerëson opsione afatgjata për të siguruar stabilitet në portë. Në qendër të vëmendjes së “Colchoneros” ka rënë emri i portierit premtues, Dennis Seimen. 20-vjeçari, i cili aktualisht mbron ngjyrat e Stuttgartit, vlerësohet si një nga talentet më të mëdhenj të futbollit gjerman. Kontrata e tij me klubin nga Bundesliga skadon në vitin 2029, por kjo nuk e ka penguar Atletico-n që ta monitorojë me kujdes progresin e tij. Megjithatë, madrilenët nuk janë të vetmit që kanë shfaqur interes për shërbimet e Seimen. Në garën për të siguruar kartonin e gardianit të ri janë përfshirë edhe gjigantët evropianë si Interi dhe Manchester United, të cilët e konsiderojnë 20-vjeçarin si një investim strategjik për të ardhmen e reparteve të tyre difensive.