Manuel Neuer shkruan historinë në Champions League: Portieri gjerman lë pas emra legjendarë

Manuel Neuer ka arritur një moment historik në karrierën e tij, duke regjistruar paraqitjen e 164-t në Ligën e Kampionëve gjatë sfidës kundër Atletico Madridit. Me këtë shifër, gardiani i Bayern Munihut ka tejkaluar dyshen Lionel Messi dhe Thomas Muller, të cilët numërojnë nga 163 ndeshje në këtë kompeticion prestigjioz. Në renditjen e përjetshme të futbollistëve me më shumë ndeshje në Ligën e Kampionëve, 40-vjeçari gjerman tashmë ka përpara vetes vetëm dy legjenda: Cristiano Ronaldon, që kryeson me 183 paraqitje, dhe Iker Casillasin, i cili mban kuotën e 177 ndeshjeve. Kjo arritje e shndërron Neuerin në futbollistin gjerman me më shumë prezenca në historinë e këtij turneu. Udhëtimi i tij evropian nisi me fanellën e Schalke 04, ku në vitin 2011 arriti të shkonte deri në gjysmëfinale. Pas transferimit te Bayern Munihu po atë vit, ai u shndërrua në një shtyllë të bavarezëve, me të cilët ka ngritur trofeun e Ligës së Kampionëve dy herë, në vitet 2013 dhe 2020. Pas këtij rekordi, emra të mëdhenj të futbollit botëror si Karim Benzema, Toni Kroos dhe Xavi Hernandez mbeten tashmë prapa Neuerit në listën e rekordeve. Për të barazuar shifrën e Iker Casillasit, portierit aktual i duhen edhe 13 ndeshje të tjera, ndërsa rekordi absolut i Cristiano Ronaldos mbetet ende objektivi më i largët për t'u arritur.