Mourinho vendos kushtin: Për Realin perfekt duhen tri vite

Strategu i Real Madridit, Jose Mourinho, ka theksuar se skuadrës spanjolle do t'i duhet një periudhë prej tri sezonesh për të arritur formën e saj ideale dhe për t'u bërë një ekip i përsosur. Në prag të sfidës si mysafir kundër AEK-ut të Athinës, tekniku portugez vlerësoi lart mundësitë e jashtëzakonshme të grupit që drejton, por paralajmëroi se, pavarësisht cilësisë, ky ekip ende nuk ka arritur të fitojë trofe. "Sa kohë do të duhet për një Real Madrid të përsosur? Tre sezone. Ky ekip ka potencial të madh, pa dyshim. Por ata nuk kanë fituar asgjë ende. Do të shohim se çfarë na pret në vazhdim", u shpreh Mourinho. Gjatë konferencës, ai ndalet te Federico Valverde, duke e vlerësuar mesfushorin uruguaian si një element kyç për grupin falë shpirtit të tij udhëheqës dhe gatishmërisë për t'u sakrifikuar në çdo repart ku kërkohet. Edhe pse është ndarë i kënaqur me mbulimin e krahut të mbrojtjes prej tij, Mourinho konfirmoi se Valverde do të kthehet shpejt në rolin e tij natyral në mesfushë, pasi alternativat atje janë të kufizuara. "Skuadra është ndërtuar për të luajtur me Valverde në mesfushë. Nuk kemi shumë mesfushorë dhe, për këtë arsye, ai me siguri do të luajë përsëri në këtë pozitë", shtoi më tej trajneri portugez, i cili konfirmoi gjithashtu se Vinicius Junior do ta nisë ndeshjen nga minuta e parë kundër AEK-ut, duke e cilësuar brazilianin si zgjedhjen ideale për krahun e majtë të sulmit. Duke analizuar sfidën e radhës, Mourinho nuk i anashkaloi sfidat që e presin skuadrën në kryeqytetin grek, duke kujtuar se statistikat historike nuk janë në anën e tyre, pasi spanjollët kanë triumfuar vetëm një herë në tetë ndeshjet e kaluara të zhvilluara në Athinë. Në mbyllje të prononcimit të tij, kreu i stolin madrilen shprehu dhimbjen e tij të thellë për ndarjen nga jeta të Jesus de Miguel, duke i përcjellë ngushëllimet më të sinqerta familjarëve dhe të afërmve të tij, teksa e quajti këtë ngjarje një humbje të rëndë për të gjithë komunitetin e futbollit.