E vërteta e ekskursionit në Mal të Zi: Si u liruan katër gjimnazistët nga Durrësi pas incidentit në Kotorr

Një udhëtim shkollor i gjimnazistëve nga Durrësi në qytetin bregdetar të Kotorrit në Mal të Zi është shndërruar në një ngjarje të papritur dhe dramatike, pasi katër nxënës përfunduan të ndaluar në komisariat pas një konflikti verbal me një shtetase malazeze. Pavarësisht versioneve të ndryshme që qarkulluan në hapësirën mediatike gjatë orëve të para, e vërteta zyrtare e ngjarjes është zbardhur përmes qëndrimit zyrtar të Ambasadës së Shqipërisë në Mal të Zi dhe dëshmisë së Anton Hasan Papajt, babait të njërit prej të miturve të përfshirë, i cili ka ndarë detajet përmes një lidhjeje direkte. Sipas njoftimit zyrtar të ambasadës, katër nxënësit shqiptarë u ndaluan më 31 tetor në Kotorr dhe u lanë të lirë pa asnjë dënim më 1 nëntor, pas përfundimit të seancës gjyqësore, duke u nisur menjëherë drejt atdheut. Ambasada ka sqaruar se adoleshentët u provokuan nga një shtetase malazeze, e cila mbajti një qëndrim të papërshtatshëm ndaj tyre. Reagimi i vetëm i të miturve ka qenë shfaqja e simbolit të shqiponjës dykrenare me duar, pa shkaktuar asnjë përplasje fizike. Megjithatë, pas kallëzimit të saj, policia malazeze ndaloi katër nxënësit, ndërkohë që u mor masë ndalimi edhe ndaj shtetases malazeze për sjelljen e saj. Përfaqësuesit e ambasadës reaguan menjëherë pas sinjalizimit në numrin e emergjencës, duke udhëtuar drejt Kotorrit atë mbrëmje për të ndjekur hap pas hapi procedurat ligjore deri në nisjen e fëmijëve. Gjatë gjithë procesit u garantua asistencë e plotë konsullore, duke vënë në dispozicion përkthyes, psikologë dhe avokatë, ndërsa autoritetet vendase konfirmuan respektimin e të drejtave të të miturve pa u raportuar ndonjë problem në komisariat. Në dëshminë e tij, Anton Hasan Papaj, efektiv policie me përvojë, tregoi se u vu në dijeni për ngjarjen me disa orë vonesë nga prindërit e tjerë dhe ndërhyri menjëherë përmes kanaleve zyrtare e jozyrtare, në bashkëpunim të ngushtë me përfaqësinë diplomatike shqiptare. Duke sjellë dinamikën e ngjarjes sipas rrëfimit të të birit, Papaj shpjegoi fillesën e situatës: “Momenti ka qenë që zonja ka filluar të flasë serbisht, serbokratisht në gjuhën e vet me gjimnazistët, të cilët, duke mos e kuptuar, i kanë kthyer përgjigjen në anglisht… dhe në momentin që kanë parë se nuk po kuptohen, kanë bërë me duar shenjën e shqiponjës për të treguar se janë shqiptarë dhe se nuk po e kuptojnë. Domethënë, kjo ka qenë fillesa e gjësë”.