Reformat në shëndetësi: Së shpejti Ligji i ri për Barnat dhe harmonizimi me standardet e BE-së

Pas një periudhe 19-vjeçare dhe mbi 20 ndërhyrjeve në aktin ekzistues juridik, autoritetet shëndetësore kanë nisur punën për hartimin e një Ligji të ri për Barnat. Ministri i Shëndetësisë, Sasho Klekovski, ka bërë të ditur se ky draft do të mundësojë përafrimin e plotë me legjislacionin evropian, pas përfundimit të konsultimeve kombëtare për këtë çështje të rëndësishme. Në këtë tryezë konsultative morën pjesë aktorë kyç të sektorit, duke përfshirë delegatë nga shoqatat e pacientëve, odat dhe industria farmaceutike, si dhe ekspertë efaqësues të institucioneve qeveritare. Duke elaboruar detajet e nismës, ministri Klekovski sqaroi se korniza e re do të shfuqizojë ligjin aktual të vitit 2007. Ai shtoi se medikamentet dhe pajisjet mjekësore do të rregullohen përmes akteve të ndara ligjore, ndërsa në agjendë është planifikuar edhe miratimi i një ligji të veçantë për veprimtarinë farmaceutike në fazën vijuese. “Për pacientin, një sistem i mirëorganizuar i barnave do të thotë ta marrë terapinë në kohë, të ketë besim në cilësinë dhe sigurinë e saj dhe të marrë informacion të saktë për përdorimin e saj”, u shpreh Klekovski gjatë fjalës së tij. Ndërkohë, si hapa të radhës janë caktuar shqyrtimi i të gjitha sugjerimeve dhe vërejtjeve të mbledhura, krijimi i instrumenteve më efikase kundër deficitit të barnave, lehtësimi i procesit për sinjalizimin e efekteve anësore, si dhe ndërtimi i një plani konkret zbatimi në bashkëpunim të ngushtë me Agjencinë për Barna dhe Pajisje Mjekësore (MALMED). “Ligji do të vlejë aq sa do të zbatohet. Prandaj, për çdo detyrim të ri duhet të dimë kush e zbaton, me çfarë kuadrosh dhe mjetesh, si dhe brenda cilit afat”, potencoi ministri. Vlen të theksohet se i gjithë ky proces po zhvillohet me mbështetjen e Zyrës së Organizatës Botërore të Shëndetësisë (OBSH) në vend.