Hapat drejt SEPA-s: Kurti dhe guvernatori Ismaili bëjnë gati aplikimin zyrtar të Kosovës

Kryeministri i Republikës së Kosovës, Albin Kurti, ka zhvilluar një takim pune me Guvernatorin e Bankës Qendrore të Kosovës (BQK), Ahmet Ismaili, për të diskutuar mbi hapat e fundit drejt integrimit financiar evropian. Temë kryesore e diskutimit ishte përmbyllja e procesit të aplikimit të Kosovës për anëtarësim në Zonën e Vetme të Pagesave në Euro (SEPA). Ky hap vjen menjëherë pas hyrjes në fuqi të Ligjit të ri për Parandalimin e Pastrimit të Parave dhe Luftimin e Financimit të Terrorizmit, ndërsa pritet që dosja formale t'i dorëzohet Këshillit Evropian të Pagesave (EPC). Gjatë takimit, Guvernatori Ismaili e njohu kreun e ekzekutivit me gjendjen e qëndrueshmërisë dhe stabilitetit të sektorit financiar në vend. Ai e informoi kryeministrin për sukseset në reformat e ndërmarra që synojnë ngritjen e cilësisë së mbikëqyrjes financiare, modernizimin e infrastrukturës bankare dhe harmonizimin e plotë të kornizës rregullative me direktivat e Bashkimit Evropian. Një vëmendje e veçantë iu kushtua edhe zhvillimit të sistemit të pagesave të shpejta – TIPS Clone. Ky projekt, në sinergji me anëtarësimin në SEPA, pritet të lehtësojë ndjeshëm barrën financiare përmes uljes së kostove të transaksioneve dhe rritjes së shpejtësisë e efikasitetit të pagesave për qytetarët dhe bizneset. Në fund të takimit, palët vunë në dukje domosdoshmërinë e një bashkëpunimi të ngushtë ndërinstitucional për jetësimin e reformave. Këto angazhime janë pjesë kyçe e Planit të Rritjes dhe shërbejnë për përafrimin e mëtejmë të legjislacionit vendor me standardet e BE-së.