Në zemër të Amerikës: Vendi ku rreth 1 mijë shqiptarë do të festojnë së bashku 28 Nëntorin

Diaspora shqiptare shquhet për përkushtimin dhe organizimin e jashtëzakonshëm të ngjarjeve që lidhen me festat tona kombëtare. Kur bëhet fjalë për komunitetet tona në Shtetet e Bashkuara të Amerikës, këto ngjarje marrin një dimension krejtësisht tjetër, duke dëshmuar dashuri të palëkundur për atdheun. Një shembull i shkëlqyer vjen nga Shoqata Amerikano-Shqiptare “Arbëria” e Hjustonit të Madh, e cila ka përgatitur një superskaktesë për 28 Nëntorin, në kuadër të 114-vjetorit të Pavarësisë së Shqipërisë. Që në momentin e publikimit të datës në rrjetet sociale, interesimi i bashkatdhetarëve tanë atje ka qenë i jashtëzakonshëm dhe masiv. Sipas informacioneve tona, për herë të parë në tri dekada, kjo ngjarje pritet të bashkojë afro 1 mijë pjesëmarrës. Qëllimi kryesor është nderimi i atdheut, kremtimi i trashëgimisë kulturore dhe forcimi i lidhjeve mes anëtarëve të komunitetit shqiptaro-amerikan në Hjustonin e Madh. Një nga veçoritë më të rralla të këtij organizimi është se hyrja do të jetë plotësisht falas. Të pranishmit do të kenë mundësinë të argëtohen nën tingujt e artistëve të njohur, si Ylli Baka me djemtë e tij, Ermal Fejzullahu, si dhe profesori i njohur dhe mjeshtri i muzikës nga Kavaja, Përparim Mefaj. Vetë drejtuesit e shoqatës kanë shprehur mirënjohje të thellë për bujarinë e donatorëve dhe mbështetësve të tyre, duke theksuar në mesazhin e tyre publik: “Përmes mirësisë dhe angazhimit të tyre, ne jemi në gjendje ta bëjmë të mundur këtë festë pa asnjë kosto për komunitetin tonë. Të gjithë janë të mirëpritur të marrin pjesë në këtë rast të veçantë falas. Kjo është mënyra jonë për të bashkuar komunitetin tonë dhe për të siguruar që çdo familje të ketë mundësinë të festojë historinë, kulturën dhe pavarësinë tonë.” Në këtë mbrëmje madhështore pritet të marrin pjesë edhe personalitete të shquara, përfshirë ambasadorë, zyrtarë të zgjedhur, akademikë dhe udhëheqës të komunitetit. Një moment historik do të jetë edhe vendimi i Kryetarit të Bashkisë së Hjustonit, i cili do ta shpallë zyrtarisht 28 Nëntorin si “Ditën e Shqipërisë”, duke vlerësuar rëndësinë e kësaj dite dhe kontributin e vyer të shqiptaro-amerikanëve. Organizatorët vunë theksin te rëndësia e unitetit, krenarisë dhe përcjelljes së vlerave kombëtare te brezat e rinj. Kjo është një mundësi e artë që fëmijët të njohin rrënjët e tyre, familjet të bashkohen dhe e gjithë diaspora të festojë lirinë dhe shtetësinë shqiptare. Të gjithë ata që do të jenë pjesë e kësaj ngjarjeje më 29 Nëntor, do të përjetojnë një atmosferë të paharrueshme në Hjustonin e Madh. Festimet nga Shoqata Amerikano-Shqiptare “Arbëria” do të fillojnë në orën 17:00 me orën lokale dhe do të vazhdojnë deri në orët e vona të natës.