Tragjedia në Itali, flet kryebashkiaku për 39-vjeçaren shqiptare: Grua shembullore, çfarë dihej për djalin e saj

Komuniteti në qytetin e Chiarit në Itali vazhdon të mbetet i tronditur thellë nga ngjarja e rëndë e regjistruar së fundmi, ku 39-vjeçarja shqiptare Meleqe Lusha dyshohet se u privua nga jeta me thikë brenda shtëpisë së saj nga djali i saj 21-vjeçar, Eduart Xhani. Pas këtij krimi tronditës, ka reaguar kreu i bashkisë së Chiarit, Gabriele Zotti, i cili u shpreh se ngjarja ka shokuar jo vetëm të afërmit që e njihnin familjen, por mbarë opinionin publik lokal. Zotti e ka portretizuar viktimën si një nënë tejet të përkushtuar dhe punëtore, e cila kishte arritur të edukonte e vetme të birin pas ndarjes nga bashkëshorti. Meleqe Lusha ishte e punësuar në Spitalin Civil të Breshias, ndërkohë që gëzonte mbështetje të vazhdueshme edhe nga katër vëllezërit e saj që operojnë në fushën e ndërtimit. Kryebashkiaku ka shtuar se 21-vjeçari ishte rritur dhe kishte ndjekur shkollimin në Chiari, duke mos shfaqur deri më tani asnjë shenjë shqetësuese apo sjellje problematike për komunitetin. “Është një djalë që deri më sot nuk ishte raportuar për probleme. Kjo e bën edhe më të vështirë të kuptohet se çfarë ka ndodhur dhe çfarë e ka çuar drejt dhunës”, ka deklaruar Zotti.