Jakupi: Ashpërsimi i masave ndëshkimore nuk i ndal krimet, institucionet të garantojnë sigurinë e qytetarëve

Analisti i çështjeve politike, Shkëlqim Jakupi, u ka bërë thirrje autoriteteve kompetente që t'i kushtojnë vëmendje thirrjeve të qytetarëve në protestat për tragjedinë e Arlinda Zekajt, duke kërkuar ndërmarrjen e hapave të menjëhershëm për të ngritur efikasitetin institucional. I ftuar në emisionin “Ditari” në Tëvë1, Jakupi vuri në dukje se garantimi i sigurisë dhe i jetës së qytetarëve përbën një detyrim parësor kushtetues dhe ligjor për shtetin. Sipas tij, ngjarjet e tilla tragjike kërkojnë një qasje tejet profesionale nga ana e strukturave shtetërore, të cilat duhet të përmirësojnë organizimin e brendshëm për të parandaluar përsëritjen e rasteve të ngjashme në të ardhmen. “Duhet institucionet përkatëse të dëgjojnë zërin e protestuesve për Arlinda Zekajn dhe të marrin masa konkrete për përmirësimin e funksionimit dhe organizimit të institucioneve, në mënyrë që rastet e ardhshme të trajtohen me profesionalizëm dhe të mbrohet jeta e qytetarit. Shteti ka përgjegjësi kushtetuese dhe ligjore që ta mbrojë jetën e qytetarit”, u shpreh Jakupi. Duke analizuar aspektin ligjor të krimeve të rënda, ai kujtoi se legjislacioni aktual penal parasheh masa ndëshkimore që variojnë nga dhjetë vite heqje lirie deri në burgim të përjetshëm. Megjithatë, eksperti politik argumentoi se politika e ngritjes së dënimeve nuk ka dëshmuar efektivitet si mekanizëm parandalues, meqenëse autorët e veprave penale, në momentin kur marrin vendimin kriminal, nuk i marrin parasysh pasojat e rënda ligjore që i kanosen. “Për veprat e tilla si vrasjet, dënimet më të vogla janë dhjetë vite dhe dënimet më të larta janë me burgim të përjetshëm, pavarësisht se kodet penale tash këto janë edhe çështje sociale sa i përket kodit penal dhe vendosjes së dënimeve për shkak se shkojnë barasvlershëm me shtetet e rajonit dhe të Evropës nuk kanë rezultuar si të suksesshme politikat e rritjes së dënimeve për shkak se kryesit e veprave penale në momentin e vendimmarrjes për kryerjen e veprës penale ata nuk mendojnë për vendimet që i presin për pasojat ligjore që mund t’i presin ata”, shtoi ai.