Tragjedia e Arlinda Zekajt: Shoqja nga Amerika kërkon hetimin e ish-vjehrrës për dhunë psikologjike dhe mungesë ndërhyrjeje

Ngjarja e rëndë që i mori jetën Arlinda Zekajt ka sjellë sërish reagime publike nga rrethi i saj shoqëror. Ana Zhubi, mikja e të ndjerës e cila jeton dhe vepron në Shtetet e Bashkuara të Amerikës, ka kërkuar publikisht nga Policia e Kosovës që të shtrijë hetimet edhe ndaj ish-vjehrrës së viktimës, duke ngritur dyshime për presion dhe dhunë psikologjike ndaj saj. Përmes një postimi në rrjetin social Facebook, Zhubi ka bërë publike edhe përvojën e saj personale, duke treguar se si kishte kaluar 16 vite të martesës së saj të parë nën trysninë e dhunës psikologjike, fyerjeve dhe përbuzjeve të vazhdueshme nga ish-vjehrra, e cila madje kishte tentuar ta dëbonte nga shtëpia duke mosrespektuar ligjet amerikane. Ajo ka theksuar se pavarësisht respektit dhe durimit të treguar, sot vazhdon të jetojë me trauma të thella. Më tej, ajo ka ngritur shqetësime serioze lidhur me rrethanat e ditës kritike, duke vënë në pikëpyetje faktin se ish-vjehrra e Arlindës dyshohet se ka qenë e pranishme dhe ka parë nga afër vrasjen brutale bashkë me fëmijët, pa ndërmarrë asnjë hap për të ndërhyrë apo ndaluar krimin. Duke sjellë në vëmendje edhe rastin e saj personal, ku gjatë një sulmi fizik nga ish-bashkëshorti, nëna e tij kishte reaguar duke i thënë djalit të mos i ndynte duart, Zhubi ka bërë thirrje të fortë drejt organeve të drejtësisë që t'i trajtojnë me seriozitet këto pretendime. Ajo ka përfunduar reagimin e saj duke kërkuar që rasti të zbardhet plotësisht dhe drejtësia të veprojë, në mënyrë që të shërbejë si një mesazh i qartë për raste të ngjashme në shoqëri, ndërkohë që ngjarjen e ka trajtuar edhe më parë gjatë një paraqitjeje live në emisionin "Kosova today" në Klan Kosova.