Skandali në Serbi: Avokati Niniq çon në dyert e drejtësisë krerët e BIA-s dhe zyrtarët e lartë për skemën e votave

Avokati serb Ivan Niniq ka ndërmarrë hapa të bujshëm ligjorë gjatë ditëve të fundit, duke dorëzuar dy kallëzime penale voluminoze në Prokurorinë për Krimin e Organizuar (TOK). Ai ngre akuza të rënda se institucionet shtetërore janë shndërruar në mekanizma për mbledhjen sistematike të të ashtuquajturave “vota kapilare”, përkatësisht firmave mbështetëse për Partinë Përparimtare Serbe (SNS). Niniq ka bërë publike dorëzimin e një padie penale ndaj drejtorit të Agjencisë për Informim të Sigurisë (BIA), Vladimir Orliq, si dhe ndaj shtatë zyrtarëve të tjerë të lartë të këtij institucioni. Personat e kallëzuar i përkasin kryesisht Qendrës Rajonale të 4-të në Kragujevc, si dhe njësive territoriale në Smederevo dhe Paraçin. Sipas dokumentit të dorëzuar, udhëheqja e BIA-s ka detyruar punonjësit e agjencisë që të sigurojnë nënshkrime dhe përkrahje për SNS-në përmes formularëve zyrtarë partiakë. Avokati pretendon se ky veprim përbën keqpërdorim të pozitës zyrtare nga një grup i organizuar kriminal, ndërsa ka bashkangjitur edhe fotografinë e kallëzimit me vulën zyrtare dhe datën e pranimit nga TOK-u. Në mesazhin e tij drejtuar opinionit publik, Niniq ka bërë thirrje që çdo punonjës i BIA-s, i cili zotëron prova apo informacione lidhur me këtë skemë, t'i dorëzojë ato për të pasuruar dosjen hetimore. Kjo ofensivë ligjore vjen pas një tjetër kallëzimi masiv të bërë më 1 nëntor, ku Niniq vuri në shënjestër 63 persona, përfshirë ministrin e Drejtësisë Nenad Vujić dhe drejtorin e Administratës për Ekzekutimin e Sanksioneve Penale. Ata akuzohen se kanë orkestruar një sistem të ngjashëm të mbledhjes së votave brenda institucioneve korrektuese në vend. Sipas pretendimeve të tij, nëpërmjet këtij rrjeti janë gjeneruar mbi 38 mijë vota. Niniq thekson se brenda sistemit të burgjeve funksiononin grupe në aplikacionin Viber të quajtura “Shtabi”, ku drejtuesve u ndaheshin kuota dhe detyra të qarta, ndërsa vartësit ishin të detyruar të raportonin mbi ecurinë e procesit. Për të provuar pretendimet e tij, avokati ka publikuar dokumente, tabela statistikore dhe pjesë nga komunikimet zyrtare, të cilat sipas tij dëshmojnë funksionimin e këtij mekanizmi partiak. Niniq kishte paralajmëruar prej ditësh se do të ndërmerrte hapa ligjorë kundër politizimit të institucioneve shtetërore. Ai e përshkruan këtë si një “sistem kapilar”, i cili përfshin tabela me firma të mbledhura, koordinatorë të caktuar, raporte pune, shfrytëzim të makinave të shërbimit dhe fotografi si dëshmi të besnikërisë ndaj partisë në pushtet. Deri në këto momente, autoritetet përkatëse, përfshirë Prokurorinë, BIA-n dhe Ministrinë e Drejtësisë, nuk kanë paraqitur ndonjë reagim apo sqarim zyrtar lidhur me këto akuza. Niniq, i njohur gjerësisht për qëndrimet e tij kritike ndaj qeverisë, ka deklaruar se do të vazhdojë të dërgojë materiale shtesë në organet e drejtësisë sa herë që të sigurojë prova të reja.