Rikthim sensacional në "Anfield"? Liverpooli po përgatit rikthimin e Alexander-Arnoldit nga Real Madridi

Gjiganti anglez Liverpool po shqyrton me seriozitet mundësinë e rikthimit të Trent Alexander-Arnoldit në skuadër, duke shfrytëzuar situatën e komplikuar që mbrojtësi po kalon në Spanjë me fanellën e Real Madridit. Sipas raportimeve nga mediet spanjolle, drejtuesit e skuadrës nga "Anfield" po mendojnë të paraqesin një propozim për huazimin e tij gjatë afatit kalimtar të janarit. Synimi i klubit anglez është ta rikthejë në shtëpi futbollistin i cili u largua nga Anglia në vitin 2025. Alexander-Arnold, i cili iu bashkua mbretërorëve për një shifër prej vetëm 8.5 milionë funtesh, po përballet me vështirësi të mëdha për të siguruar një vend në përbërjen e parë të drejtuar nga Jose Mourinho. Aktualisht, 28-vjeçari renditet si opsioni i tretë për krahun e djathtë të mbrojtjes. Në përballjen e fundit kundër Barcelonës, ai mbeti përgjatë gjithë ndeshjes në stol, me Mourinhon që preferoi mesfushorin Federico Valverde në atë pozicion. Gjatë këtij edicioni, mbrojtësi anglez është aktivizuar në vetëm shtatë takime ku ka regjistruar një asistim. Përveç Liverpoolit, interesim të jashtëzakonshëm për shërbimet e tij ka shfaqur edhe Chelsea. Megjithatë, drejtuesit e Real Madridit nuk janë të gatshëm të lejojnë largimin e tij pa kushte të favorshme financiare. Klubi spanjoll pritet të kërkojë përfshirjen e një klauzole të detyrueshme blerjeje në rast huazimi, meqenëse kartoni i lojtarit vlerësohet rreth 51 milionë funte në treg. Pavarësisht hapësirave të kufizuara, Alexander-Arnold pati mundësinë të luante në fitoren 3-0 ndaj Racing Santander, ku tekniku Mourinho vlerësoi lart aftësitë e tij teknike. “E aktivizova Trent-in, i cili nuk kishte luajtur prej një kohe, sepse pashë se cilësia e tij teknike do të na ndihmonte ta nxirrnim topin nga prapavija”, deklaroi trajneri portugez, i cili u shpreh i kënaqur me nivelin dhe ekuilibrin e treguar nga mbrojtësi. Në anën tjetër, burime pranë klubit madrilen bëjnë me dije se Alexander-Arnold nuk po insiston në mënyrë aktive për t'u larguar nga Madridi, megjithëse e ardhmja e tij afatgjatë mbetet e paqartë. Paralelisht, Real Madridi po ndjek me vëmendje situatën e Pedro Porros të Tottenhamit, mbrojtës ky që është gjithashtu në radarin e Barcelonës.