Çitaku pas votimit të deklaratës për UÇK-në: Qeveria duhet të ndërmarrë hapa konkretë për ndryshimin e ligjit

Nënkryetarja e Partisë Demokratike të Kosovës, Vlora Çitaku, ka përshëndetur miratimin e njëzëri të Deklaratës për mbrojtjen e vlerave të Ushtrisë Çlirimtare të Kosovës dhe ish-udhëheqësve të saj nga ana e deputetëve të Kuvendit. Nëpërmjet një reagimi në rrjetet sociale, Çitaku ka shprehur mirënjohjen e saj për 99 ligjvënësit që votuan pro kësaj rezolute. Megjithatë, ajo ka theksuar se ky hap duhet të pasohet nga veprime konkrete institucionale, duke kërkuar nga ekzekutivi që të procedojë sa më parë në Kuvend Projektligjin për ndryshimin dhe plotësimin e Ligjit për Dhomat e Specializuara. “Kuvendi sot e shprehu vullnetin e tij. Tani është radha që Qeveria ta sjellë në Kuvend Projektligjin për ndryshimin dhe plotësimin e Ligjit për Dhomat e Specializuara, që ai të votohet pa vonesë. Deklarata është zotim. Ligji është veprim. T’i jetësojmë të dyjat pa vonesa. Sot u pa që është e mundur. UÇK-ja të na bashkojë”, ka shkruar Çitaku në postimin e saj.