Buçkovski parashikon fundin e VLEN-it: Rezultati në Bërvenicë dëshmon rritjen e BDI-së

Ish-kryeministri i Maqedonisë së Veriut, Vllado Buçkovski, vlerëson se triumfi i Bashkimit Demokratik për Integrim (BDI) në Komunën e Bërvenicës përbën një këmbanë alarmi për koalicionin VLEN. Sipas tij, përplasjet e fundit ku OBRM-PDUKM e etiketon VLEN-in si “kalë Troje”, dëshmojnë qartë se ky i fundit po përballet me një shterim të konsiderueshëm të bazës elektorale në mesin e shqiptarëve. Në një analizë për mediumet, Buçkovski theksoi se mobilizimi etnik dhe votat e diasporës ishin faktorët kyç që përcaktuan kthesën në Bërvenicë. Ai shtoi se për OBRM-PDUKM-në do të jetë thuajse e pamundur të riprodhojë mbështetjen e gjerë që gëzonte kryetari i mëparshëm, i cili kishte arritur të bashkonte votuesit maqedonas dhe shqiptarë në një platformë të vetme. Duke iu përgjigjur pikëpyetjeve nëse rezultati i një komune të vetme mund të shërbejë si pasqyrë për gjithë vendin, Buçkovski u shpreh i bindur se hendeku mes BDI-së dhe VLEN-it do të thellohet edhe më tej në të ardhmen. “Këto janë trendet aktuale. BDI po shënon rritje, ndërsa VLEN-i ndodhet në një rënie të vazhdueshme. OBRM-PDUKM po qeveris me partnerë që, sipas vlerësimeve, kanë rënë në nivelin e gabimit statistikor”, deklaroi ai, duke iu referuar këtu VLEN-it dhe ZNAM-it. Sipas ish-kryeministrit, pikërisht ky tkurrje e mbështetjes popullore është arsyeja kryesore pse koalicioni VLEN nuk ka interes për zgjedhje të parakohshme parlamentare. Megjithatë, ai paralajmëron një skenar edhe më të zymtë për partnerët e vegjël të koalicionit qeverisës. Buçkovski beson se nëse mandati shkon deri në fund, OBRM-PDUKM-ja rrezikon t’i “konsumojë” politikisht partnerët e saj deri në atë pikë, saqë siguria e tyre për të fituar mandate në zgjedhjet e ardhshme të rregullta do të jetë tejet e pasigurt.