Testi vendimtar për Trumpin: Amerikanët votojnë sot në zgjedhjet e mesmandatit mes sfidave ekonomike dhe pakënaqësisë popullore

Ndërsa kanë mbetur edhe dy vjet nga mandati i tij presidencial, Donald Trump – figura që ka dominuar dhe ridimensionuar skenën politike amerikane gjatë dekadës së fundit – po alishon një nga sfidat e tij më vendimtare politike. Zgjedhjet e mesit të mandatit që mbahen këtë të martë do të përcaktojnë se kush do të ketë kontrollin e Kongresit, duke u shfaqur në një periudhë tejet të ndjeshme për Partinë Republikane. Në qendër të shqetësimeve të qytetarëve amerikanë që po drejtohen drejt kutive të votimit është kostua e lartë e jetesës. Çmimet e ushqimeve dhe të karburanteve kanë shënuar rritje të ndjeshme, të ndikuara nga tarifat agresive tregtare të presidentit dhe konflikti i hapur me Iranin, çka pritet të ndikojë fuqishëm në vendimin e elektoratit. Megjithëse është përballur me nivele rekord të ulëta të miratimit gjatë muajve të fundit, Trump ka zhvilluar një fushatë intensive, duke kryesuar dhjetëra tubime anembanë vendit. Presioni nga çmimet e larta prek votuesit e të gjitha krahëve politikë, një fakt që shpjegon pse në fundjavë ai e zhvilloi fushatën e tij në bastione tradicionale republikane si Iowa dhe Kansas. Për më tepër, struktura drejtuese e partisë së tij ka investuar qindra miliona dollarë në fushata publicistike pikërisht në këto zona që dikur konsideroheshin të sigurta, siç është gara për Senatin në Kansas, ku sondazhet tregojnë se demokratët kanë shanse reale. Në tubimet e tij, përfshirë atë të zhvilluar të dielën në Kansas, Trump u është drejtuar mbështetësve me një thirrje të qartë: “Në këto zgjedhje, po ju kërkoj të bëni sikur jam në fletën e votimit. Thjesht bëni sikur”. Ndonëse ai vetë nuk garon formalisht në këto zgjedhje, kjo thirrje prek një dilemë kyçe: a mbetet ai ende një forcë e sigurt elektorale për kandidatët republikanë? Përgjigja për këtë pyetje është bërë më e ndërlikuar se kurrë më parë. Pas fitores së tij të bujshme në zgjedhjet presidenciale të vitit 2024, Trump u rikthye në Shtëpinë e Bardhë me mbështetje të fortë. Megjithatë, situata ka ndryshuar rrënjësisht. Konflikti i zgjatur me Iranin ka rënduar xhepat e qytetarëve, duke sjellë rënie të ndjeshme të popullaritetit të tij. Për shembull, çmimi i një galoni nafte – i cili ishte 3.75 dollarë përpara nisjes së luftës në muajin shkurt –seu ngjit në një nivel rekord prej 6.52 dollarësh gjatë muajit shtator. Edhe inflacioni ka pësuar rritje nga 3% në kohën kur Trump mori detyrën, në 3.7% aktualisht, ndërsa ekspertët e ekonomisë vlerësojnë se politika e tarifave globale ka ndikuar në këtë ecuri. Kjo panoramë e vështirë ekonomike ka krijuar shqetësime të thella në radhët e republikanëve se ata mund të humbasin terren edhe në shtete tradicionalisht të sigurta, siç janë Teksasi, Ohio dhe Kansasi.