Mbrojtja e Sassuolos në krizë të thellë: 12 gola të pësuar në tri ndeshje pa Arijanet Muricin në portë

Trajneri i Sassuolos, Alberto Aquilani, më herët kishte shprehur hapur besimin e tij te Arijanet Murici, duke pranuar megjithatë se gardiani i Përfaqësueses së Kosovës po kalonte një fazë sfiduese në karrierën e tij. “Kam respekt të pafund për këtë lojtar. E shoh si portier me potencial të konsiderueshëm. Ai mund të luajë në çdo ligë në botë. Është e qartë se po kalon disa vështirësi dhe gabimet e përsëritura po ndikojnë tek ai dhe te ekipi. Kemi folur për këtë dhe ai e di. Është djalë i sjellshëm dhe inteligjent. Duhet ta ndihmoj atë dhe ekipin, dhe këtë po e marr në konsideratë”, pati deklaruar strategu italian. Mirëpo, pas këtyre deklaratave, rrethanat ndryshuan rrënjësisht për portierin dardan. Murici u ul në stol për tri sfidat e fundit të skuadrës, por ky vendim nuk solli stabilitetin e multinuar në repartin e prapavijës. Seria negative nisi me humbjen 2-0 përballë Comos, u pasua nga disfata e rëndë 6-2 kundër Lazios, ndërsa në përballjen e fundit u regjistrua një tjetër humbje 4-2 nga Fiorentina. Në këto tri takime ku guardiani kosovar nuk u aktivizua, skuadra e drejtuar nga Aquilani ka kapur shifrën e 12 golave të pranuar, duke dëshmuar se problemet defensive të skuadrës shkojnë përtej performancës së portierit. Murici e kishte humbur vendin e titullarit pas një ndeshjeje me gabime ndaj Frosinonit, duel ky që u mbyll me rezultatin 4-2 për kundërshtarët. Sidoqoftë, statistikat dhe rezultatet e fundit kanë ngritur dilema të mëdha nëse ulja e tij në bankën rezervë ka qenë zgjidhja e duhur për ekipin.