Magjia e Raphinhas te Barcelona: Sulmuesi barazon rekordin historik të Leo Messit

Barcelona ka harruar hapat falsë të javës së kaluar, duke dhënë një shfaqje force në “Spotify Camp Nou” dhe duke mposhtur Alavésin me rezultatin e thellë 6-1 të shtunën. Skuadra e drejtuar nga Hansi Flick u përgjigj në fushë në mënyrën më të mirë të mundshme, ku padyshim një nga yjet e mbrëmjes ishte Raphinha, autor i dy golave. Përveçse konfirmoi rikthimin e tij në formën më të mirë pas dëmtimit të pësuar gjatë angazhimit me kombëtare, sulmuesi brazilian la gjurmë të pashlyeshme në statistikat e klubit katalunas. Në 11 paraqitjet e tij të para këtë edicion në La Liga, Raphinha ka arritur të tundi rrjetën plot 15 herë. Kjo statistikë mbresëlënëse e fut atë në një elitë të ngushtë me vetëm katër lojtarë në historinë e gjatë të Barçës që kanë regjistruar shifra të tilla në nisje të kampionatit. Me këtë ecuri fantastike, ai ka imituar arritjet e dikurshme të Mariano Martínit nga sezoni 1943/44, César Rodríguezit në edicionet 1948/49 dhe 1950/51, si dhe legjendarit Lionel Messi në sezonin 2012/13. Fakti që emri i tij tashmë përmendet krahas atij të Messit dëshmon madhështinë e këtij momenti për Raphinhën, i cili po shkruan kapituj të artë me fanellën e katalunasve. Dy herë realizuesi ndaj Alavésit ka arritur në kuotën e 92 gola të shënuar në total për skuadrën blaugrane. Ky bilanc e ka barazuar atë me Justo Tejadan, duke e ngjitur në pozicionin e 23-të mes golashënuesve më të mirë në historinë e klubit. Në horizont duken sfida të reja, pasi Raphinha ka vetëm dy gola diferencë nga dy figura të shquara të klubit, José Ramón Bakero dhe Ronaldinho. Nëse ruan këtë ritëm shkatërrues para portës, ai mund të synojë shumë shpejt edhe dhjetëshen më të mirë historike, ku kufiri sillet rreth 120 finalizimeve. Në rrafshin kolektiv, ky fillim sezoni po rezulton rekord për Barcelonën e Flickut, e cila ka regjistruar plot 46 gola në vetëm 11 ndeshjet e para të La Ligës, duke shfaqur një potencial të frikshëm në fazën sulmuese.