Trump frenon planet për konflikt të ri me Iranin: Masat ekonomike po gjunjëzojnë Teheranin

Kreu i Shtëpisë së Bardhë, Donald Trump, ka bërë të ditur se nuk ka asnjë ngut për të rifilluar një konfrontim ushtarak me Republikën Islamike. Gjatë një interviste për televizionin izraelit Channel 12, ai theksoj se kufizimet e rënda ekonomike të vendosura nga Uashingtoni po e gjunjëzojnë gradualisht udhëheqjen në Teheran, ndërkohë që qytetarët iranianë janë të dëshpëruar nga kriza e vazhdueshme. Sipas shefit të shtetit amerikan, bisedimet indirekte midis dy vendeve, të lehtësuara nga Katari, po zhvillojnë një ecuri pozitive. Megjithatë, ai pranoi se pala amerikane mbetet skeptike rreth strukturës reale të vendimmarrjes në Iran, duke shtuar se SHBA-ja nuk ka ndërmend të bjerë pre e ndonjë mashtrimi apo të zvarritet përsëri në situata të padëshiruara. Trump vuri në dukje se zyrtarët e lartë iranianë po shfaqin më pak nguti nga sa parashikohej, pavarësisht faktit se ata po shfaqin një dëshirë të theksuar për të arritur një marrëveshje, si kurrë më parë që prej shpërthimit të armiqësive. Në rrethin e ngushtë të presidentit, qasjet ndaj hapave të ardhshëm janë të ndara. Një fraksion i këshilltarëve të tij, në bashkëpunim me liderët e shteteve kryesore të Gjirit Persik, mbështesin fuqimisht rrugën diplomatike. Ata vlerësojnë se një aksion i ri ushtarak nuk do të sillte ndryshime rrënjësore në terren. Në kontrast me ta, një krah tjetër insiston në rikthimin e luftës dhe arritjen e plotë të synimeve strategjike. Kjo linjë mbështetet hapur edhe nga kryeministri izraelit, Benjamin Netanyahu, i cili thuhet se i ka bërë thirrje direkte Trump-it gjatë një bisede telefonike të zhvilluar të shtunën që të rinisë sulmet ushtarake. Ndërkaq, një grup i tretë zyrtarësh, nën drejtimin e Sekretarit të Thesarit Scott Bessent, i sugjeron administratës të mbajë në fuqi bllokadën detare dhe sanksionet e rrepta, duke pritur që qëndrimi i Teheranit të zbutet natyrshëm gjatë javëve dhe muajve në vijim.