E ardhmja te Manchester United, Carrick: Nuk i shoh vetëm edhe dy ndeshje në dispozicion

Pavarësisht presionit në rritje që po shoqëron rezultatet e fundit, Michael Carrick mbetet i palëkundur se nuk gjendet në një situatë ku i kanë mbetur vetëm dy ndeshje për të shpëtuar stolin e tij te Manchester Unitedi. Klubi anglez do të presë Romën të martën në kuadër të Ligës së Kampionëve, ndërsa para pauzës së radhës për ndeshjet e kombëtareve skuadrës i duhet të zhvillojë vetëm dy takime. Këto rrethana kanë ushqyer spekulimet lidhur me fatin e Carrickut në krye të ekipit. I ballafaquar me pyetjen nëse e ndien veten të rrezikuar se ka mbetur vetëm me dy ndeshje jetëgjatësi në detyrë, ai u përgjigj prerazi: “Jo, aspak. Nuk mund të mendosh për të ardhmen. Asnjëherë nuk e di se çfarë do të ndodhë. As unë nuk e di se çfarë do të ndodhë.” “Kjo nuk e ndryshon mënyrën se si ndihem. Nuk e ndryshon as mënyrën se si po përgatitemi për ndeshjen e nesërme. Në fakt, mezi po e pres këtë takim,” shtoi ai. Më tej, ai pranoi se të tjerët mund ta shohin këtë qasje ndryshe: “Mund të mendoni se jam i çmendur, duke parë rezultatet që kemi pasur dhe gjithçka që po ndodh, por sinqerisht mezi po e pres ndeshjen e nesërme. Kjo është e vetmja gjë në të cilën jam i përqendruar.” “Çfarëdo që të ndodhë, do të ndodhë pas saj, në çfarëdo drejtimi që të shkojë situata. Por fillimisht duam ta bëjmë një natë të madhe ndeshjen e nesërme,” deklaroi Carrick. Gjatë konferencës, trajneri anglez u pyet edhe rreth përkushtimit të futbollistëve të tij, duke u ndalur te rasti specifik i Lisandro Martinezit. Mbrojtësi nga Argjentina u ndëshkua me karton të kuq gjatë humbjes 2-0 kundër Chelseat të shtunën, pasi mori dy kartonë të verdhë brenda hapësirës prej tri minutash. Fillimisht ai u ndëshkua për një ndërhyrje ndaj Morgan Rogersit, kurse menjëherë pas kësaj u përjashtua për shkak të një goditjeje me krah ndaj Wesley Fofanës. Ky episod ndodhi në një kohë të ndjeshme për Martinezin, përkushtimi i të cilit ishte vënë në dyshim në opinion pas një interviste ku ai pati kritika për drejtorin e futbollit, Jason Wilcox, lidhur me disfatën ndaj Atletico Madridit dhe strategjinë e klubit në merkato. Megjithatë, Carrick hodhi poshtë çdo aludim se ka shqetësime rreth dëshirës së argjentinasit për të mbrojtur ngjyrat e Manchester Unitedit. “Jo, nuk kam absolutisht asnjë shqetësim sa i përket angazhimit. Gjëra të ndryshme ndodhin në futboll. Ndonjëherë bën diçka, ndonjëherë merr një vendim, ndonjëherë gabon dhe ndonjëherë gjithçka të shkon mirë. Por angazhimi i tij nuk është aspak problem,” theksoi ai. Në fjalën e tij përmbyllëse, Carrick u pyet gjithashtu për perspektivën e Martinezit dhe Bruno Fernandesit, duke pasur parasysh se të dy lojtarët po hyjnë në vitin e fundit të kontratave aktuale me klubin. Strategu nuk ofroi detaje konkrete nëse drejtuesit e Manchester Unitedit kanë marrë ndonjë vendim zyrtar për zgjatjen e marrëveshjeve të tyre. “Kur gjithçka të përfundojë, ju e dini se si zhvillohen diskutimet dhe, kur të finalizohet gjithçka, do t’ju njoftojmë. Por në këtë fazë nuk ka asgjë të re për të bërë të ditur,” përfundoi Carrick.