Zgjedhjet në SHBA: Mbi 54 milionë qytetarë votojnë para afatit zyrtar në një garë kyçe për Kongresin

Procesi zgjedhor në Shtetet e Bashkuara të Amerikës ka regjistruar një pjesëmarrje masive paraprake, ku mbi 54 milionë votues tashmë kanë kryer detyrën e lor qytetare për Senatin dhe Dhomën e Përfaqësuesve. Kjo përballje politike mes republikanëve dhe demokratëve pritet të përcaktojë ekuilibrin e ri të forcave në Kongres, duke sjellë pasoja direkte për agjendën qeverisëse të presidentit Donald Trump. Të dhënat tregojnë se nga rreth 200 milionë zgjedhës të regjistruar në mbarë vendin, më shumë se 25 për qind e tyre kanë shfrytëzuar mundësinë e votimit të hershëm, qoftë përmes postës, apo duke u paraqitur fizikisht në qendrat e votimit. Ky fluks i lartë ka tërhequr vëmendjen e analistëve, të cilët vlerësojnë se, nëse ky ritëm ruhet edhe në ditën zyrtare të zgjedhjeve, vendi mund të shënojë një ndër pjesëmarrjet më të larta në historinë e deritanishme. Aktualisht, Partia Republikane e udhëhequr nga presidenti Donald Trump gzon një epërsi të ngushtë si në Senat ashtu edhe në Kongres, ndërsa demokratët synojnë përmbysjen e këtij rezultati. Sondazhet e opinionit publik lënë të kuptohet se një ndryshim i tillë është i mundshëm, pasi shumë matje u japin përparësi demokratëve. Megjithatë, përvoja e kaluar dëshmon se si Trump, ashtu edhe partia e tij, shpesh kanë arritur rezultate finale që i kanë tejkaluar parashikimet e sondazheve. Nëse demokratët sigurojnë kontrollin e plotë të Kongresit dhe Senatit, planet e presidentit për pjesën e mbetur të mandatit mund të përballen me pengesa serioze. Vetë kreu i Shtëpisë së Bardhë ka paralajmëruar se nëse rivalët politikë fitojnë dhe tentojnë të miratojnë nisma ligjore që bien në kundërshtim me vizionin e tij, ai do të shndërrohet në “zotëri veton”, duke shfrytëzuar fuqinë e vetos presidenciale për të bllokuar çdo vendim të tyre.