Kasapolli skeptik për komisionet hetimore: Kur nuk duhet të kryhet punë, formohen grupe pune

Ish-ambasadori Gëzim Kasapolli ka shprehur rezerva të forta rreth themelimit të komisioneve hetimore, duke nënvizuar se ato nuk sjellin zgjidhje reale për sfidat shoqërore nëse përfundimet e tyre mbeten vetëm në letër pa u zbatuar në praktikë. I ftuar në emisionin “Ditari” në Tëvë1, teksa ka komisionuar komisionin hetimor parlamentar të ngritur për rastin e Arlinda Zekajt, Kasapolli vlerësoi se shteti i Kosovës nuk vuan nga mungesa e ligjeve, por nga sfidat e theksuara në zbatimin e tyre. Duke sjellë në vëmendje një thënie të njohur nga koha e tij në institucione, ai ilustroi skepticizmin e tij ndaj dobisë së këtyre mekanizmave. “Unë kur isha pjesë e institucioneve, ka ekzistuar një shprehje: kur s’don me kry punë, bën mbledhje ose komisione. Do të thotë, jemi të ngopur me këto komisione apo edhe me rezoluta, të cilat në fakt nuk po gjejnë zbatim”, ka deklaruar Kasapolli. Sipas tij, pengesa kryesore nuk lidhet me boshllëqet ligjore apo mungesën e instrumenteve institucionale, por me mungesën e vullnetit për t'i jetësuar ato dhe mungesën e një strategjie më funksionale për trajtimin e fenomeneve të tilla. “Unë nuk shoh asnjë mangësi brenda legjislacionit tonë në raport me trajtimin e këtyre çështjeve. Kemi problem me zbatim, nuk kemi problem me legjislacion, nuk kemi problem me grupet të cilat duhet të krijohen. Po flasim për një problem shoqëror, i cili duhet të trajtohet me elemente dhe me mjete institucionale”, është shprehur ai. Në optikën e ish-diplomatit, kur vendi përballet me shifra të larta të dhunës, zgjidhja kërkon ngritjen e njësive të specializuara brenda radhëve të Policisë, gjyqësorit dhe Prokurorisë, me qëllim që rastet të trajtohen me prioritet absolut dhe profesionalizëm të lartë. “Nëse ke një problem të tillë, ku ke 2 mijë raste të dhunës brenda vitit, atëherë duhet të krijohet një mekanizëm brenda Policisë, brenda gjyqësorit dhe Prokurorisë, që të trajtohen në mënyrë të prerë. Këto çështje mund të bëjnë komisione gjithë ditën, por nuk besoj që do të ketë efekt, nuk do të ketë impakt”, ka thënë Kasapolli. Duke iu referuar edhe episodeve të tjera të dhunës që regjistrohen vazhdimisht në vend, ai përsëriti nevojën emergjente për një strukturë të specializuar që adreson këtë problematikë shqetësuese. “Për çdo ditë po shohim shumë raste të tilla. Edhe rastin e sotëm me drejtorin e mirëqenies. Për mua, kemi nevojë për mirëmbajtje të legjislacionit dhe për këtë arsye duhet të krijohet një strukturë, një sistem më i specializuar, i cili e sheh këtë problematikë të thellë shoqërore”, ka deklaruar Kasapolli. Në mbyllje të prononcimit të tij, Kasapolli la të kuptohet se krijimi i komisioneve hetimore, pa ndërmarrë hapa të prekshëm dhe pa zbatuar rekomandimet, rrezikon të shndërrohet në një procedurë thjesht formale, pa asnjë ndikim vendimtar në parandalimin dhe trajtimin e rasteve të dhunës.