Auditorët hapen në mbarë vendin, por një grup studentësh ndërpret mësimin për të thirrur në protestë

Procesi akademik është rikthyer në normalitet këtë të hënë në pjesën dërrmuese të universiteteve publike në vend. Mësimi në auditorë ka vijuar rregullisht në Universitetin e Mjekësisë, Fakultetin e Drejtësisë, atë të Histori-Filologjisë, Ekonomik, si dhe në Universitetin Politeknik. Ky rikthim në sallat e leksioneve i ka dhënë fund bojkotit dyjavor. Vetë studentët kishin rënë dakord përmes grupeve të tyre të komunikimit se vijimi i bojkotit vetëm sa do t'i dëmtonte, pasi çdo orë e humbur shkon në dëm të formimit të tyre profesional. Megjithatë, paralel me zhvillimin normal të leksioneve në disa prej institucioneve, rreth mesditës një grup i rinjsh u mblodh fillimisht para Universitetit Politeknik dhe më pas nisi një marshim drejt fakulteteve të tjera në kryeqytet, duke hyrë brenda sallave dhe ndërprerë orët e mësimit. Me thirrjet “Bojkotoni mësimin” dhe “Bashkohuni me ne”, protestuesit kaluan nga Fakulteti i Ekonomisë te ai i Historisë dhe Filologjisë, te Drejtësia dhe fakultete të tjera, duke kërkuar nga kolegët e tyre që të braktisin sallat dhe t'i bashkohen lëvizjes. Më pas, ky grup u drejtua edhe drejt Fakultetit të Shkencave të Natyrës, ku përsëritën të njëjtën thirrje para trupës studentore. Në rang vendi, situata paraqitet e qetë dhe mësimi po zhvillohet rregullisht edhe në universitetet rajonale në Shkodër, Korçë, Vlorë, Elbasan dhe Gjirokastër. Në Korçë, Këshilli Studentor kishte njoftuar që të premten se nga dita e hënë do të rikthehej plotësisht frekuentimi i auditorëve. Përmes një njoftimi zyrtar, u bë e ditur se vendimi erdhi pas qetësimit të situatës nga incidentet e dhunshme dhe pas adresimit të kërkesave të ngritura nga të rinjtë. Sipas Këshillit Studentor në Korçë, bojkotimi nuk gjeti zbatim të plotë, pasi një pjesë e konsiderueshme e studentëve vijuan të merrnin pjesë rregullisht në leksione përgjatë gjithë ditëve të bojkotit.