Operacioni ndërkombëtar “The Wanted”: Pranga në Spanjë 36-vjeçarit të shpallur në kërkim për vrasje të mbetur në tentativë në Shkodër

Një operacion i përbashkët ndërkombëtar, i koduar “The Wanted”, ka çuar në arrestimin e një 36-vjeçari shqiptar në territorin spanjoll, i cili ishte shpallur në kërkim ndërkombëtar për akuzat e tentativës së vrasjes dhe armëmbajtjes pa leje. Sipas informacioneve zyrtare, kapja e shtetasit A. N., me origjinë nga Shkodra, u bë e mundur falë shkëmbimit të menjëhershëm të informacionit mes Policisë së Shtetit shqiptar dhe autoriteteve policore të Interpol Madridit. Ai tashmë është vënë në pranga në mënyrë të përkohshme, ndërkohë që po ndiqen hapat ligjorë për ekstradimin e tij drejt vendit tonë. Bëhet e ditur se ky shtetas ishte shpallur person në kërkim pasi, në vitin 2022, Gjykata e Shkallës së Parë të Juridiksionit të Përgjithshëm Shkodër i kishte caktuar masën shtrënguese të sigurisë “Arrest në burg”. Ai akuzohet zyrtarisht për veprat penale të “Vrasjes”, mbetur në tentativë, si dhe për “Mbajtjen pa leje dhe prodhimin e armëve, armëve shpërthyese dhe të municionit”. Ngjarja për të cilën akuzohet 36-vjeçari daton në muajin mars të vitit 2022. Sipas hetimeve paraprake të autoriteteve, dyshohet se për motive të dobëta, ai ka përdorur një armë zjarri automatike duke qëlluar në drejtim të një objekti në pronësi të shtetasit S. S., ngjarje kjo e regjistruar në lagjen “Skënderbeg”, e cila për fat të mirë solli vetëm dëme materiale pa lënduar njerëz. Ndërkohë, strukturat e specializuara të Interpol Tiranës janë duke bashkëpunuar ngushtë me homologët e tyre në Madrid për të përmbyllur me sukses të gjitha procedurat burokratike dhe teknike për sjelljen e të dyshuarului para drejtësisë shqiptare.